Քաղաքական վերնախավը փորձում է ինքնապաշտպանվել այնպիսի լրատվամիջոցներից, որոնք իրենց քննադատում են. Շուշան Դոյդոյան

«Զանգվածային լրատվության մասին» օրենքում արված նոր փոփոխությամբ՝ պետական մարմիններին հնարավորություն է ընձեռվում վերահսկողություն սահմանել լրատվամիջոցների նկատմամբ եւ ոչ շահեկան լույսի ներքո հրապարակումները կարող են առիթ հանդիսանալ լրագրողին զրկել հատավարմագրումից, ինչն արդարացի չէ եւ չի բխում ժողովրդավարության շահերից։ Այս մասին NEWS.am-ի հետ զրույցում ասել է Ինֆորմացիայի ազատության կենտրոնի նախագահ Շուշան Դոյդոյանը՝ անդրադառնալով երեկ խորհրդարանի կողմից ընդունված օրինագծին, որով հնարավորություն է տրվում պետական մարմնին զրկել լրագրողին հավատարմագրումից, եթե նա աշխատանքային կանոնների խախտման համար նախատեսված գրավոր նախազգուշացվելուց հետո մեկ տարվա ընթացքում կրկին խախտել է այդ կանոնները։

Նշենք, որ գործող կարգավորմամբ, լրագրողը հավատարմագրումից կարող է զրկվել միայն լրատվամիջոցի դիմումի հիման վրա։

«Այս օրինագծի ընդունումն ավելի շատ ինքնապաշտպանական մեխանիզմի գործադրում է: Քաղաքական վերնախավը սրանով փորձ է անում ինքնապաշտպանվել եւ ապահովագրել իրենց անհարմար հարցեր հնչեցնող լրագրողներից, այնպիսի լրատվամիջոցներից, որոնք իրենց քննադատում են։ Եվ որպեսզի անհարմար վիճակում չհայտնվեն, նման կարգավորում են բերել»,- ասաց Շուշան Դոյդոյանը:

Փորձագետի խոսքով՝ Հայաստանում հավատարմագրման կարգերը բարեփոխման կարիք ունեն, որովհետեւ ընդունված կարծիք կա, թե հավատարմագրումը կարող է բովանդակային խնդիրներ լուծել, մինչդեռ ըստ Դոյդոյանի՝ հավատարմագրումը բացառապես տեխնիկական ընթացակարգ է:

«Հավատարմագրումը երկու նպատակով կարող է սահմանվել այն կառույցների դեպքում, որոնց հանդեպ այնքան մեծ է հետաքրքրությունը, որ լրագրողների թիվն այնքան մեծ է, եւ կառույցը ֆիզիկապես չի կարող այդքան լրատվամիջոցների ներկայացուցիչներ տեղավորել, ուստի սահմանվում է հավատարմագրում, որպեսզի ավելի կազմակերպված իրականացվի լուսաբանման գործընթացը: Այսինքն՝ տեղով պայմանավորված սահմանափակումները կարող են հիմք լինել հավատարմագրման կարգ ընդունելու համար: Եվ երկրորդ հիմքը՝ անվտանգությունն է։ Անվտանգության նկատառումներով, այո՛, կարող են սահմանվել հավատարմագրման կարգեր: Բացառապես այս երկու հիմքով է, որ հավատարմագրումը կարող է լինել ողջամիտ եւ արդարացված»,- շեշտեց Շուշան Դոյդոյանը:

Ինֆորմացիայի ազատության կենտրոնի նախագահն ընդգծեց, որ նախագծի մշակման ժամանակ լրագրողական հանրությունը դժգոհություն էր հայտնել եւ հիմնավորումներ բերել, սակայն դրանք հաշվի չեն առնվել։