Ավստրալիայի նոր կառավարությունը Չինաստանին կոչ է արել չեղարկել առեւտրային պատժամիջոցները

Ավստրալիայի նոր կառավարությունը Չինաստանին կոչ է արել չեղարկել առեւտրային պատժամիջոցները, եթե նա ցանկանում է վերբեռնել երկկողմ հարաբերությունները:

Չինաստանի վարչապետի շնորհավորական նամակը վարչապետ Էնթոնի Ալբանեզեին՝ ընտրություններում հաղթանակի կապակցությամբ, ընդունվել է որպես Ավստրալիայի հետ բարձր մակարդակի կառավարական շփումների Պեկինի երկամյա արգելքի մեղմացում: Վարչապետ Լի Կեցիանը հայտարարել է, որ Չինաստանը պատրաստ է աշխատել Ավստրալիայի հետ երկկողմ հարաբերությունները զարգացնելու համար, հաղորդում է AP-ն:

Վերջին տարիներին Չինաստանը ստեղծել է մի շարք պաշտոնական եւ ոչ պաշտոնական առեւտրային խոչընդոտներ՝ միլիարդավոր դոլարների ավստրալական ապրանքների, այդ թվում՝ ածխի, գինու, գարու, տավարի մսի եւ ծովամթերքի համար:

«Հենց Չինաստանն է պատժամիջոցներ սահմանել Ավստրալիայի դեմ»,- ասել է Ալբանեզեն լրագրողներին: «Դրա համար որեւէ պատճառ չկա, ուստի դրանք պետք է վերացվեն»։

Ֆինանսների նախարար Ջիմ Չալմերսը նաեւ կոչ է արել Չինաստանին անհապաղ վերացնել ազատ առեւտրի գործընկերների միջեւ առեւտրային խոչընդոտները: «Մենք, անշուշտ, կցանկանայինք, որ այդ պատժամիջոցներն ու այդ մաքսատուրքերը հանվեին։ Դրանք վնաս են հասցնում մեր տնտեսությանը։ Դրանք դժվարացնում են մեր որոշ գործատուների եւ աշխատողների կյանքը, եւ հետեւաբար, ակնհայտ է, մենք կցանկանայինք, որ այդ միջոցները հանվեին»,- ասել է Չալմերսը: