Սկանդինավյան երկրները հյուրատուն են ահաբեկչական կազմակերպությունների համար. Էրդողան

Անկարան դեմ է Ստոկհոլմի և Հելսինկիի՝ ՆԱՏՕ-ին հնարավոր անդամակցությանը։ Այդ մասին հայտարարել է Թուրքիայի նախագահը։

«Մենք հետևում ենք Ֆինլանդիայում և Շվեդիայում զարգացումներին, բայց դրական ոչինչ այդ հարցում չենք տեսնում։ Սկանդինավյան երկրները հյուրատուն են ահաբեկչական կազմակերպությունների համար»,- ընդգծել է Ռեջեփ Էրդողանը։

Նրա խոսքով՝ Թուրքիայի նախկին վարչակազմերը սխալ են թույլ տվել Հունաստանի հարցում՝ թույլ տալով նրան հայտնվել դաշինքում․

«Մենք չենք ցանկանում երկրորդ անգամ սխալվել»,- հավելել է նախագահը։

Ավելի վաղ Ֆինլանդիայի արտգործնախարարը հայտնել էր, որ Հելսինկին մտադիր է ՆԱՏՕ-ին անդամակցելու հայտ ներկայացնել հաջորդ շաբաթ։

ԱՄՆ պետքարտուղարությունն արձագանքել է Ֆինլանդիայի և Շվեդիայի՝ ՆԱՏՕ-ին հնարավոր անդամակցության վերաբերյալ Անկարայի հայտարարությանը:

«Վաշինգտոնն աշխատում է Թուրքիայի դիրքորոշումը հստակեցնելու ուղղությամբ։ Միաժամանակ, Միացյալ Նահանգները վերահաստատում է իր աջակցությունը Ստոկհոլմին և Հելսինկիին Հյուսիսատլանտյան դաշինքին միանալու հարցում և հաշվի է առնում Անկարայի բացասական վերաբերմունքը ՆԱՏՕ-ի նման ընդլայնմանը»,- հայտնել են կառույցից։

Պետքարտուղարությունում նաև գնահատել են Իրանի հետ միջուկային գործարքի վերականգնման հնարավորությունը, ընդգծել՝ «ոչինչ երաշխավորված չէ, արդյունքը կախված է Թեհրանից»։

Իրանի արտգործնախարար Հոսեյն Ամիր Աբդոլլահիանն իր հերթին համոզմունք է հայտնել, որ միջուկային ծրագրի վերաբերյալ Գործողությունների համատեղ համապարփակ ծրագրի վերականգնման հարցով Վիեննայի բանակցողները կարող են համաձայնության հասնել, եթե Միացյալ Նահանգները քաղաքական որոշում կայացնի և կատարի իր պարտավորությունները։