Կիևն անում է ամեն ինչ՝ պաշտպաններին «Ազովստալից» տարհանելու համար. Զելենսկի

Կիևն անում է ամեն ինչ՝ պաշտպաններին «Ազովստալից» տարհանելու համար` հայտարարել է Ուկրաինայի նախագահը: Վոլոդիմիր Զելենսկին նշել է, որ Կիևն այդ նպատակով ներգրավում է ազդեցիկ միջնորդների: Նրա խոսքով՝ Ռուսաստանի հետ «շատ բարդ բանակցություններ» են ընթանում։ Զելենսկու խոսքով՝ տարհանման առաքելության հաջորդ փուլով նախատեսվում է գործարանից դուրս բերել ծանր վիրավորում ստացածներին, բուժաշխատողներին:

Ուկրաինացի ժողովրդին Զելենսկին խոստացել է ազատագրել բոլոր այն քաղաքները, որոնք գտնվում են ռուսական բանակի վերահսկողության տակ: «Խարկովի շրջանի ազատագրումն ապացուցում է, որ մենք ոչ ոքի չենք թողնի թշնամուն»,- իր ելույթում նշել է Ուկրաինայի ղեկավարը: Վոլոդիմիր Զելենսկին նաև կոչ է արել ավելացնել ռազմական և ֆինանսական օգնությունը Կիևին, քանի որ, իր խոսքով՝ «Ռուսաստանի ներխուժման ժամանակ միայն դա է ազատությունը պաշտպանելու բաղադրատոմսը»։