ՎԶՄԲ-ն ևս 26,6 մլն եվրո կհատկացնի Հայաստանին՝ պետական կառավարման համակարգի արդիականացման համար

Կառավարությունն իր այսօրվա՝ մայիսի 13-ի նիստում հավանություն տվեց Հայաստանի և Վերակառուցման ու զարգացման միջազգային բանկի միջև ստորագրված «Պետական հատվածի արդիականացման չորրորդ ծրագիր» վարկային համաձայնագիրը վավերացնելու մասին ՀՀ օրենքի նախագծին:

Որոշման հիմնավորման մեջ ասվում է. «Հայաստանի Հանրապետության և Վերակառուցման և զարգացման միջազգային բանկի (այսուհետ՝ ՎԶՄԲ) միջև 2022թ. մարտի15-ին և մարտի 18-ին ստորագրվել է «Պետական հատվածի արդիականացման չորրորդ ծրագիր» վարկային համաձայնագիրը՝ 26,5 մլն եվրո գումարի չափով:

Համաշխարհային բանկի աջակցությամբ իրականացված նախորդ երեք՝ Պետական հատվածի արդիականացման ծրագրերի ձեռքբերումների շարունակականությունն ապահովելու և լրացուցիչ նախարարությունների ներդրմամբ պետական կառավարման համակարգի արդիականացման նպատակով ՀՀ կառավարությունը նպատակահարմար է համարել Համաշխարհային բանկի աջակցությամբ նախագծել և իրականացնել Պետական հատվածի արդիականացման 4-րդ ծրագիրը։

Ծրագրի նպատակն է քաղաքացիական ծառայության շարունակական բարեփոխումների, պետության և տեղական ինքնակառավարման մարմինների կողմից մատուցվող ծառայությունների թվայնացման և ընտրված էլեկտրոնային կառավարման համակարգերի ներդրման միջոցով աջակցել պետական կառավարման համակարգի արդիականացմանը։

Այս ծրագրի շրջանակներում ներառված գործողությունները հնարավորություն կտան․

• աջակցել քաղաքացիական ծառայության արդիականացմանը՝ ավագ գործադիր կորպուսի/ծառայության ներդրմամբ (6.2. Պետության կողմից հանրությանըմատուցվող ծառայություններ, էջ 88-89),

• ընդլայնել պետության կողմից մատուցվող թվային ծառայությունները՝ դրանց թիվը հասցնելով 350-400-ի (2.3 Բարձր տեխնոլոգիաներ, էջ 34-35),

• արդիականացնել հարկային վարչարարության համակարգերը՝ ապահովելով բջջային հավելվածում հարկային ծառայությունների իրականացումը (6.9 Հարկային ևմաքսային վարչարարություն, էջ 97-98),

• ներդնել կիբեռանվտանգության և հարակից ինստիտուցիոնալ մեխանիզմները(2.3 Բարձր տեխնոլոգիաներ, էջ 34-35),

• հիմնել պետական տվյալների կառավարման միասնական կենտրոն (G-Cloud ամպային հիբրիդային մոդելի շրջանակում) (2.3 Բարձր տեխնոլոգիաներ, էջ 34-35)և այլն։

Առաջարկվող Ծրագիրը հիմնվում է ՀԲ աջակցությամբ իրականացված նախորդ երեք ՊՀԱԾ-ների ձեռքբերումների վրա՝ նպատակ ունենալով խթանել Հայաստանում հանրային հատվածի գործառույթների և ծառայությունների արդիականացման ուղղությամբ GovTech՝ հանրային հատվածի արդիականացման համապետական մոտեցման ներդնումը:

Ծրագրի հաջող իրականացման արդյունքում ակնկալվում է բարձրացնել ընտրված պետական ծառայությունների արդյունավետությունը ու բարելավել դրանց հասանելիությունը բիզնեսի և քաղաքացիների համար։