ԵՄ-ն դիտարկում է ռուսական նավթի արգելքը հետաձգելու հարցը

ԵՄ դիվանագետները դիտարկում են կտրուկ տարբերակ՝ շրջանցելու Հունգարիայի վարչապետ Վիկտոր Օրբանի՝ ռուսական նավթի ներմուծման արգելքին աջակցելու դժկամությունը՝ կասեցնելով ծրագիրը:

Ինչպես գրում է Politico-ն, գաղափարն այն է, որ Ռուսաստանի Դաշնության դեմ ԵՄ պատժամիջոցների վեցերորդ փաթեթի մյուս տարրերն առաջ կգնան բոլոր 27 անդամ երկրների աջակցությամբ։ Բայց ռուսական նավթի եւ նավթամթերքի ներմուծման ամբողջական արգելքը կարող է հետաձգվել, քանի դեռ աշխատանքը շարունակվում է փոխզիջումային համաձայնագրի վրա, որը Հունգարիան կարող է ընդունել, ասել են ԵՄ դիվանագետները:

Նման ուշացումը մեծ հետընթաց կլինի ԵՄ-ի ջանքերում: Սա, մասնավորապես, հարված կլինի Եվրահանձնաժողովի ղեկավար Ուրսուլա ֆոն դեր Լյայենին, որը մայիսի 4-ին առաջարկել է պատժամիջոցների վեցերորդ փաթեթի նախագծի շրջանակներում ամբողջությամբ արգելել ռուսական նավթի բոլոր ներմուծումները։

Այն փաստը, որ դիվանագետները դիտարկում են նման դրամատիկ քայլը, ցույց է տալիս, թե որքան դժվար է ԵՄ-ի համար ուժեղացնել իր տնտեսական հարձակումը Կրեմլի դեմ, եւ որքան ցավալի է հրաժարվել ռուսական էներգետիկ ռեսուրսներից:

Ծով ելք չունեցող երկրների համար, ինչպիսիք են Հունգարիան եւ Սլովակիան, որոնք մեծապես կախված են խողովակաշարով ռուսական նավթի մատակարարումներից, հում նավթի արգելքը ցավալի կլինի: ԵՀ-ն փորձել է փոխզիջման հասնել Օրբանի հետ, սակայն մինչ այժմ նրա կառավարությունն ասում է, որ նրան ավելի շատ ժամանակ եւ, հնարավոր է, ավելի շատ գումար է պետք: