Մարկ Էսպերին մեղադրել են անլոյալության մեջ, քանի որ նա հրաժարվել է հաստատել, որ Սոլեյմանին ուզում էր գրոհել դեսպանատները

Պենտագոնի նախկին ղեկավար Մարկ Էսպերը իր հուշերում պնդում է, որ նախագահ Դոնալդ Թրամփի դաշնակիցները դժգոհել են իր «անլոյալությունից» այն բանից հետո, երբ ինքը չի հաստատել նախագահի 2020 թվականի մեղադրանքները, թե սպանված իրանցի գեներալ-մայոր Ղասեմ Սոլեյմանին փորձել է հարձակվել ամերիկյան չորս դեսպանատների վրա, գրում է BI.-ն։

Իր նոր՝ «Սրբազան երդում. Արտակարգ ժամանակներում պաշտպանության նախարարի հուշերը» գրքում Էսպերն ասում է, թե իր հետախուզական հարցումները ցույց չեն տվել, որ Սոլեյմանին հատուկ թիրախավորել է չորս դեսպանատներ:

Էսպերը գրում է, որ թեեւ անհանգստացած էր հարձակումներով, անհարմար է զգացել հաստատել Թրամփի այն պնդումները, որոնք նա նկարագրում է գրքում՝ հավելելով, որ նախկին նախագահը անազնվության օրինակ է ցույց տվել:

«Փաստ է, որ Թրամփը սովորաբար չափազանցնում էր եւ հաճախ անում այնպիսի հայտարարություններ, որոնք հնարավոր չէր հաստատել կամ ուղղակի ակնհայտ հորինված էին»,- գրում է պաշտպանության նախկին նախարարը։

Էսպերը իր գրքում հիշում է 2020 թվականի հունվարին Fox News-ի հարցազրույցը Թրամփի հետ։ Նախագահը պնդումներ էր արել, որոնք, ըստ պաշտպանության նախկին նախարարի, ներառված չէին ԿՀՎ հետախուզության զեկույցներում։

Այդ տարվա հունվարի 10-ին՝ Սոլեյմանիի սպանությունից ընդամենը մի քանի օր անց, «Թրամփը Fox News-ին ասաց, որ Սոլեյմանին ծրագրել էր հարձակվել Մերձավոր Արեւելքում մի քանի դիվանագիտական թիրախների վրա՝ նշելով դեսպանատները»,- գրում է նա։ «Դրանից քիչ առաջ Պոմպեոն լրատվամիջոցներին ասել էր, որ Միացյալ Նահանգները չգիտի, թե երբ եւ որտեղ կարող են տեղի ունենալ հարձակումները, բայց խոստովանել էր, որ դեսպանատները վտանգի տակ են»,- հավելել է նա:

«Դա համահունչ էր հետախուզական տվյալների իմ ըմբռնմանը, զեկույցներին, որ ես ստանում էի, եւ կանխարգելիչ միջոցառումներին, որոնք մենք ձեռնարկում էինք»,- ասում է Էսպերը: «Բաղդադում դեսպանատունը ակնհայտորեն սպառնալիքի տակ էր, եւ Բեյրութում դեսպանատան հետ կապված մտահոգություններ կային, ուստի մենք ամրացրինք նաեւ այդ վայրը: Նաեւ, ինչպես նշեցի ավելի վաղ, ինձ մտահոգում էր Քուվեյթում եւ Բահրեյնում մեր դեսպանատների անվտանգությունը»:

Պաշտպանության նախկին նախարարը գրքում կրկնում է, որ թեեւ ինքը համաձայն է, որ սպառնալիքներ են եղել դեսպանատների հանդեպ, սակայն չորս օբյեկտների վերաբերյալ Թրամփի պնդումները չեն կարող հաստատվել։

«Ես չեմ հիշում, որ որեւէ կոնկրետ չորս թիրախ նշվի իմ ճեպազրույցներում եւ ԿՀՎ-ի զեկույցներում»,- գրում է նա։ «Հետեւաբար, երբ առաջին անգամ հայտնվեցի CNN-ի եթերում կիրակի օրը՝ հունվարի 12-ին, երկու բան պարզ հասկացրի՝ նախ ես չորս դեսպանատների վրա հարձակման կոնկրետ որեւէ ապացույց չէի տեսել, եւ երկրորդ՝ ես դեռ հավատում էի, որ մի քանի դեսպանատների հասցեին սպառնալիքներ կան։ Անկախ դրանից, Թրամփի կոնկրետ պնդումը, թե հետախուզությունը հայտնել է, որ Սոլեյմանին թիրախավորել է չորս դեսպանատներ, հաստատելու իմ դժկամությունը լարել էր իմ հարաբերությունները նախագահի հետ: Վստահելի գործընկերն ինձ ասաց, որ Թրամփի ընկերներից ոմանք զանգահարել են նրան՝ բողոքելով, որ ես «խանգարում եմ» եւ «լոյալ չեմ», եւ նույնիսկ առաջարկել են նրան «հեռացնել Էսպերին»՝ իր ազնվության համար»։

Սոլեյմանին սպանվել է 2020 թվականի հունվարին Իրաքում Բաղդադի միջազգային օդանավակայանի մոտ ամերիկյան անօդաչու թռչող սարքի հարձակման հետեւանքով։ Թրամփը պնդում էր, որ մի քանի դեսպանատների վրա հարձակման սպառնալիքն է ստիպել է իրեն հարվածելու հրաման տալ:

Թրամփի վարչակազմը երբեք հստակ ապացույցներ չի ներկայացրել, որ Սոլեյմանին անմիջական վտանգ էր ներկայացնում տարածաշրջանում ԱՄՆ անձնակազմի համար, եւ այնուհետեւ հարվածի փոփոխական հիմնավորումներ է ներկայացրել, քանի որ Կոնգրեսի օրենսդիրները կասկածի տակ էին դնում դրա օրինականությունը: