ԵՄ-ը պատրաստ է գնել Վիկտոր Օրբանի համաձայնությունը ՌԴ-ի դեմ պատժամիջոցների հարցում

ԵՄ-ը դիտարկում է Հունգարիային ֆինանսական փոխհատուցում տրամադրելու հնարավորությունը՝ փորձելով համոզել վարչապետ Վիկտոր Օրբանին ստորագրել ռուսական նավթի դեմ առաջարկվող պատժամիջոցների տակ, գրել է Politico-ն։

ԵՄ-ի երեք ներկայացուցիչների խոսքով՝ դրամական միջոցները կարող են Բուդապեշտ ուղարկվել միության նոր էներգետիկ ռազմավարութան շրջանակում, որը պետք է ներկայացվի հաջորդ շաբաթ, որպեսզի վերջ դրվի ռուսական վառելիքից կախվածությանը։

Հունգարիայի աջակցությունն այս հարցում ԵՄ-ին անհրաժեշտ է քաղաքական նպատակի հասնելու համար, որն էլ եվրոպական ուժեղ եւ միասնական դիմակայությունն է Ռուսաստանի գործողություններին։

Օրբանը մինչ այժմ արգելափակում էր համաեվրոպական պատժամիջոցները ռուսական նավթի դեմ, դրանք առաջարկվել էին մայիսի 4-ին։ Նշվում էր, որ ներմուծման դադարեցումը հավասարազոր կլինի Հունգարիայի տնտեսության վրա «միջուկային ռումբ» գցելուն։

Եվրահանձնաժողովի (ԵՀ) նախագահ Ուրսուլա ֆոն դեր Լյայենի եւ Օրբանի միջեւ բանակցությունները երկուշաբթի ավարտվել են անարդյունք, իսկ դրան հաջորդելիք տեսակոնֆերանսը, որը նախատեսված էր երեքշաբթի, չեղարկվել է։

ԵՄ-ի պատժամիջոցների ամենավերջին նախագիծը նախատեսում էր Հունգարիային եւ Սլովակիային մինչեւ 2024թ. վերջը ժամանակ տալ նավթի արգելքին հետեւելու հարցում։ Դա երկու տարով ավելի է, քան ԵՄ-ի մնացած մասերում։ Չեխիային ժամանակ է տրվելու մինչեւ 2024թ. հունիս։

Բայց Հունգարիան նշել է, որ իրեն ավելի շատ ժամանակ է հարկավոր, որպեսզի պակասեցնի իր կախվածությունը ռուսական նավթից։ Պաշտոնյաները հայտարարել են, որ ժամկետները չձգձգելու համար կարող են վերանայել ֆինանսական փոխհատուցման ձեւը։

ԵՀ-ը հույս ունի օգտագործել REPowerEU անվանմամբ վճարային մեխանիզմներն իր էներգետիկ ռազմավարությունում, որի մասին կհայտարարվի մայիսի 18-ին, եւ որում պետք է լինեն միջոցներ ԵՄ երկրների (ներառյալ Հունգարիան) համար։ REPowerEU ռազմավարությունն ուղղված է մինչեւ 2030թ. ռուսական վառելիքի տեսակներից աստիճանական հրաժարմանը։

Պաշտոնական անձինք եւ դիվանագետներն այժմ փորձում են փոխզիջում գտնել, որպեսզի «հրապուրեն» Բուդապեշտին։ Ֆրանսիայի նախագահ Էմանուել Մակրոնը հեռախոսով խոսել է Օրբանի հետ, որպեսզի «համերաշխության ոգով համաձայնեցնի այն երաշխիքները, որոնք անհրաժեշտ են նավթի մատակարարման պայմանների համար», ասել է Ելիսեյան պալատի ներկայացուցիչը։

Պարզ չէ, թե կհաջողվի արդյոք համաձայնության գալ Հունգարիայի հետ՝ ԵՄ-ի դեսպանների նոր հանդիպումից առաջ, ասել են մի քանի դիվանագետներ եւ պաշտոնական անձինք։