Ժողովրդային շարժման երեկոյան երթերը արդեն վերածվել են Հայ Ժողովուրդի միկրոտիեզերքի. Սփյուռքահայ գործարար Կարեն Մկրտչյան

Ժողովրդային շարժման երեկոյան երթերը արդեն վերածվել են Հայ Ժողովուրդի միկրոտիեզերքի – բոլոր ոլորտներից մարդիկ, կասիրներ, բանկիրներ, իրավաբաններ, մատուցողներ, գործադիր տնօրեններ, բժիշկներ, ուսանողներ, ուսուցիչներ, պրոֆեսորներ, տարեցներ, երիտասարդներ, ամբողջ ընտանիքներ, երեխա գրկած մայրեր, երևանցիներ, մարզերից ու Արցախից ժամանածներ, Սփյուռքահայեր, հայրենադարձներ, բոլորը միավորվել են որ վերականգնեն իրենց ազգային միասնությունը։ Այս մասին Facebook-ի իր էջում գրել է սփյուռքահայ գործարար Կարեն Մկրտչյանը:

«Մարդիկ հոգնել են արհեստականորեն ստեղծված պառակտումից, ուզում են համերաշխ ապրել իրենց հայրենակիցների հետ։ Ժամանակավոր կառավարությունը պիտի անպայման ձեռք մեկնի բոլոր հայերին անխտիր, ու նորից հետ բերի մեր միասնությունը»,-հավելել է նա:

Նշենք, որ այսօր ժամը 12-ին Երեւանում չորս ուղղությունով անհնազանդության երթեր և ակցիաներ են մեկնարկել: Առաջին երթը մեկնարկել է Գայի պողոտայից՝ «Մեգամոլ» առևտրի կենտրոնի մոտից, երկրորդը Րաֆֆու փողոցից՝ Անդրանիկի արձանի մոտից, երրորդը՝ 15 թաղամասից՝ Չաուշի արձանի մոտից և չորրորդը՝ Սասունցի Դավթի արձանի մոտից։

Ժամը 19.00-ին Ֆրանսիայի հրապարակում տեղի կունենա ամփոփիչ հանրահավաք։