Արքայազն Չառլզը խորհրդարանի նստաշրջանի բացմանը կարող է ելույթ ունենալ Եղիսաբեթ II-ի փոխարեն. Times

Բուքինգհեմյան պալատը պլաններ է մշակել անկանխատեսելի հանգամանքների համար, որոնք ենթադրում են, որ բրիտանական թագաժառանգ, Ուելսի արքայազն Չառլզը կարող է հաջորդ շաբաթ ելույթ ունենալ խորհրդարանի նոր նստաշրջանի բացմանը, եթե արարողությանը չկարողանա ներկա գտնվել Մեծ Բրիտանիայի 96-ամյա թագուհին՝ Եղիսաբեթ II-ը, տեղեկացրել է Times թերթը։

Ինչպես պարբերականին ասել է Ուայթհոլի (փողոց Լոնդոնում, որտեղ գտնվում են երկրի գլխավոր կառավարական հաստատությունները) աղբյուրը, քիչ հավանական է, որ թագուհին խոսք ասի, որում կներկայացվի պահպանողականների կառավարության ծրագիրը։ Իսկ թագավորական ըտանիքի աղբյուրների տեղեկացմամբ՝ միապետը դեռեւս ծրագրում է ելույթ ունենալ, բայց նրա մասնակցությունն արարողությանը կհաստատվի միայն դրա անցկացման օրը։

1953թ. իր թագադրման ժամանակվանից Եղիսաբեթ II-ը ընդամենը երկու անգամ է բաց թողել այդ արարողությունը։ 1959 եւ 1963թթ. նա չի եկել խորհրդարան, քանի որ հղի էր։ Այդ ժամանակ ելույթը, թագուհու թույլտվությամբ, կարդացել է լորդ-կանցլերը՝ Լորդերի պալատի խոսնակը։

Չնայած միապետի թագավորական խոսքը ձեւական է, այն մեծ նշանակություն ունի բրիտանական միապետության համար։ Դրա տեքստը, որում կառավարությունը ներկայացնում է իր աշխատանքի պլանը խորհրդարանի նոր նստաշրջանի ընթացքում, գրվում է կառավարության անդամների եւ հաստատվում վարչապետի գրասենյակի կողմից։ Թագուհին դրանում որեւէ փոփոխություն մտցնելու իրավունք չունի, անգամ եթե հավանություն չի տալիս կառավարության առաջարկներին։

Ինչպես մինչ այդ տեղեկացրել էր թագուհու գրասենյակը, Եղիսաբեթ II-ը չի մասնակցի Բուքինգհեմյան պալատում ամառային ընդունելություններին։ Այս տարի Նորին Գերազանցությունը պալատի այգու երեկույթներին «ներկայացված կլինի թագավորական ընտանիքի այլ անդամներով», նշվել է հաղորդագրությունում։

Վերջին ժամանակներս Եղիսաբեթ II-ը, որն անցած տարվա հոկտեմբերին առաջին անգամ հանրությանը ներկայացել է ձեռնափայտով, շարժվելու հետ կապված խնդիրներ ունի։ Նա չի մասնակցել պաշտոնական մի քանի միջոցառումների, մասնավորապես՝ առաջին անգամ այս տարի ներկա չի եղել ապրիլի 14-ին կաթոլիկների եւ բողոքականների կողմից նշվող Մեծ հինգշաբթիի ընդունելությանը։ Բայց նա շարունակում է «ընդունելությունները» օնլայն ռեժիմով, իսկ անցած շաբաթ Լոնդոնի մոտ, Վինձորի ամրոցում ընդունել է Շվեյցարիայի նախագահ Ինյացիո Կասիսին։