«Այս պայքարը ենթադրում է նաեւ նման բաներ». Լևոն Քոչարյանը՝ իրեն բերման ենթարկելու մասին

Ինչպես գիտեք, այսօր ինձ բերման ենթարկեցին, կոնկրետ ցուցումով եկան ինձ բերման ենթարկելու համար եւ այդպես էլ ասացին: Այս մասին Facebook-ի իր էջի ուղիղ եթերում ասաց ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը:

«Ապօրինի բերման ենթարկեցին, իբր ոստիկանության օրինական պահանջին չենթարկվելու համար: Տեսնում եք՝ ես արդեն ազատ եմ արձակվել, հիմա էլ Ֆրանսիայի հրապարակում եմ:

Շնորհակալություն եմ ուզում հայտնել բոլորին, որոնք գրեցին, աջակցեցին, մտահոգվեցին: Ամեն ինչ լավ է, այս պայքարը ենթադրում է նաեւ նման բաներ: Բոլորս պետք է պատրաստ լինեն դրան: Ուրիշ ձեւ չի լինում: Սա ուղղակի ցույց է տալիս, թե այս մարդիկ ինչքան սարսափած են, ինչքան վախեցած են: Օր օրի այս շարումն ավելի մեծ թափ է առնում: Այս ամենը շատ կարեւոր է, ա մենք անում ենք մեր երկրի, մեր ապագայի, մեր հայ մնալու համար: Այնպես որ պայքարը շարունակվում է: Կարծում եմ՝ հաջողությունը մոտ է»,-ասաց նա՝ կոչ անելով ժամը 19-ին մասնակցել Ֆրանսիայի հրապարակում կայանալիք հանրահավաքին:

Հիշեցնենք, որ այսօր Լեւոն Քոչարյանին ոստիկանները բերման են ենթարկել Բաղրամյան պողոտայից:

Նշենք նաև, որ Պոլիտեխնիկի մի խումբ ուսանողներ միացել էին Նիկոլ Փաշինյանի հրաժարականի պահանջով անհնազանդության բողոքի ակցիային։ Նրանք փակել էին բուհի դիմացի՝ Տերյան փողոցի հատվածը։ Միաժամանակ հնչում էր «Հայեր միացեք» երգը։

Նշենք, որ վաղ առավոտից «Դիմադրության շարժման մասնակիցները կաթվածահար են արել մայրաքաղաքի մի շարք փողոցներ։ Ոստիկանները ակցիայի մասնակիցներին բերման են ենթարկում՝ բռնի ուժ կիրառելով։

Ավելի վաղ հայտնել էինք, որ մայիսի 2-ից խաղաղ անհնազանդության ակցիաներ են սկսվել Երեւանում, փակվել են մի շարք փողոցներ:

Մայիսի 1-ի երեկոյան հանրահավաքից հետո ընդդիմադիր ուժերը վրաններ էին տեղադրել եւ գիշերը մնացել Ֆրանսիայի հրապարակում։ ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հանրահավաքի ընթացքում հայտարարել է, որ այսօրվանից անհնազանդության խաղաղ գործողություններ են սկսվելու ամբողջ հանրապետությունով մեկ․ փակվելու են հատկապես մայրաքաղաքի կենտրոնական փողոցները։

Ցուցարարները փակել էին նաև Երևան-Արարատ մայրուղին և քայլերթով գալիս էին Երևան:

Նշենք, որ վաղ առավոտից «Դիմադրության շարժման մասնակիցները կաթվածահար են արել մայրաքաղաքի մի շարք փողոցներ։ Ոստիկանները ակցիայի մասնակիցներին բերման են ենթարկում՝ բռնի ուժ կիրառելով։ Բացի այդ, փակվել են մի շարք մայրուղիներ, այդ թվում Երեւան-Սեւան, Վանաձոր-Սեւան մայրուղիները: