Գերմանիան մինչեւ տարեվերջ կկարողանա հաղթահարել ռուսական նավթի ներկրման ԵՄ էմբարգոն. Ռոբերտ Հաբեկ

Գերմանիայի էկոնոմիկայի նախարար Ռոբերտ Հաբեկը հայտարարել է, որ մինչ այս տարվա վերջ Գերմանիան կկարողանա հաղթահարել ռուսական նավթի ներկրման ԵՄ էմբարգոն, թեեւ դա կարող է դեֆիցիտի հանգեցնել, փոխանցում է Reuters-ը:

Ավելի վաղ եվրոպացի դիվանագետները հայտարարել էին, որ ԵՄ-ն հակված է մինչեւ տարեվերջ արգելել ռուսական նավթի ներկրումը Ռուսաստանի դեմ պատժամիջոցների վեցերորդ փուլի շրջանակներում։ ԵՄ էներգետիկայի նախարարները երկուշաբթի ավելի ուշ Բրյուսելում պետք է քննարկեն նավթի առաջարկվող արգելքը։

«Մեզ հաջողվել է հասնել մի իրավիճակի, երբ Գերմանիան կարող է դիմակայել նավթի էմբարգոյին», - ասել է Հաբեկը՝ նշելով, որ դա անհետեւանք չի մնա։

Ֆինանսների նախարար Քրիստիան Լինդներն էլ ավելի հեռուն է գնացել՝ գերմանական հեռարձակողին հայտարարելով, որ գերմանական տնտեսությունը կկարողանա դիմակայել ռուսական նավթի ներկրման նույնիսկ անհապաղ արգելքին:

«Մենք կարող ենք հրաժարվել ռուսական ածուխի եւ նավթի ներկրումից,- ասել է Լինդները WELT-ին։- Հնարավոր է, որ վառելիքի գները բարձրանան».

Գերմանիան անցած ամիս կրճատեց ռուսական նավթի մասնաբաժինը մինչեւ 25 տոկոս:

Հաբեկն ասել էր, որ Գերմանիայի համար գլխավոր մարտահրավերը նավթի այլընտրանքային մատակարարումներ գտնելն է Շվեդտում նավթավերամշակման գործարանի համար, որը ղեկավարում է ռուսական պետական ​​«Ռոսնեֆտ» ընկերությունը, որը մատակարարում է Արեւելյան Գերմանիայի շրջանները, ինչպես նաեւ՝ Բեռլինի մայրաքաղաքային թաղամասը:

Հաբեկի խոսքով՝ այդ տարածքները կարող են մատակարարման դեֆիցիտի բախվել ԵՄ-ի կողմից էմբարգոյի դեպքում, եթե Գերմանիան մինչեւ տարեվերջ չկարողանա այլընտրանքային նավթի ներկրում ապահովել, ասել է Հաբեկը: «Շվեդտի նավթավերամշակման գործարանի համար դեռ լուծում չունենք,- ասել է Հաբեկը:- Մենք չենք կարող երաշխավորել, որ մատակարարումները շարունակական կլինեն։ Անշուշտ, կլինեն թանկացումներ եւ որոշակի ընդհատումներ։ Բայց դա չի նշանակում, որ մենք նավթային ճգնաժամի մեջ կընկնենք»։

Կանցլերի խորհրդական Յորգ Կուկիսը Financial Times-ին ասել է, որ Գերմանիան կողմ էր հանդես եկել ռուսական նավթի վրա ԵՄ պլանավորված էմբարգոյին, սակայն եւս մի քանի ամիս է ցանկանում՝ այլընտրանքներ գտնելու համար: