ԱՄՆ-ի հետ ռազմավարական կայունության շուրջ երկխոսությունը սառեցված է. ՌԴ ԱԳՆ

Ռազմավարական կայունության շուրջ ռուս-ամերիկյան երկխոսությունը պաշտոնապես սառեցված է, եւ այդ հարցում համագործակցության հեռանկարներ չկան։ Նման կարծիք է հայտնել ՌԴ ԱԳՆ-ի Սպառազինությունների չտարածման եւ վերահսկման հարցերով վարչության տնօրեն Վլադիմիր Երմակովը։

«Այսօրվա դրությամբ իրավիճակն այնպիսին է, որ ԱՄՆ-ի հետ ռազմավարական կայունության շուրջ բանակցությունների հեռանկարի մասին խոսելու կարիք չկա։ Ցավոք, Վաշինգտոնի բոլոր գործողություններն ուղղված են տրամագծորեն հակառակ ուղղությամբ։ Ցանկացած երկխոսության եւ առավել եւս ռազմավարական երկխոսության ժամանակ անհրաժեշտ է առնվազն համարժեք գործընկեր ունենալ: Այս պահին ամերիկյան կողմից այդպիսի երկխոսությունը պաշտոնապես սառեցված է», - ՏԱՍՍ-ին տված հարցազրույցում ասել է դիվանագետը։

Ռուսաստանի եւ ԱՄՆ-ի համագործակցությունը համաձայնագիր է նախատեսում, որն ամրագրված էր Միջին եւ փոքր հեռահարության հրթիռների վերացման մասին պայմանագրով: 2019 թվականի օգոստոսի 2-ին ԱՄՆ-ը դուրս եկավ համաձայնագրից՝ Ռուսաստանին մեղադրելով այն խախտելու մեջ։ Ռուսական իշխանությունները հերքել են մեղադրանքները՝ հայտարարելով, որ ԱՄՆ-ն միայն պատրվակ էր փնտրում սպառազինությունների վերահսկման սահմանափակումներից ազատվելու համար։

2021 թվականի դեկտեմբերի 18-ին Ռուսաստանը պաշտոնապես դուրս եկավ «Բաց երկնքի մասին» պայմանագրից, որը կարգավորում էր մասնակից երկրների տարածքով թռիչքների ռեժիմը՝ նրանց ռազմական գործողություններին նշված սահմանափակումների շրջանակներում հետեւելու համար, գրում է «Կոմերսանտ»-ը։