Գերմանիան Իտալիայի դեմ հայց է ներկայացրել ՄԱԿ-ի միջազգային դատարան

Գերմանիան Իտալիայի դեմ հայց է ներկայացրել Հաագայի Արդարադատության միջազգային դատարան՝ Երկրորդ համաշխարհային պատերազմի ժամանակ նացիստական ​​հանցագործությունների համար փոխհատուցումների վճարման հետ կապված կոնֆլիկտի կապակցությամբ։ Դաշնային Հանրապետությունը մեղադրում է Իտալիային, որ ի հեճուկս ՄԱԿ-ի միջազգային դատարանի 2012 թվականի որոշման, այն փոխհատուցման նոր վարույթներ է թույլ տվել Գերմանիայի դեմ (առնվազն 25 հայց, որոնցից 15-ը որոշվել է հօգուտ հայցվորների), հայտնում է Deutsche Welle-ն՝ վկայակոչելով դատարանի մամուլի ծառայությունը։

Մեկ տասնամյակ առաջ ՄԱԿ-ի Գերագույն դատարանը երկար դատավարության ընթացքում որոշում կայացրեց, որ Գերմանիան չպետք է անհատական ​​փոխհատուցում վճարի Իտալիայում նացիզմի զոհերին: Դրանով Արդարադատության միջազգային դատարանը հաստատել է Պետության անձեռնմխելիության սկզբունքը, ըստ որի՝ Իտալիայում մասնավոր հայցվորների օգտին կայացված վճիռներն անվավեր են։

Գերմանիայի կառավարությունն իր դիրքորոշումը հիմնավորում է նրանով, որ փոխհատուցման հարցերն արդեն կարգավորվել են Երկրորդ համաշխարհային պատերազմի արդյունքներով միջպետական ​​համաձայնագրերի շրջանակներում։ 2008 թվականին Գերմանիան դիմել էր Արդարադատության միջազգային դատարան՝ պարզելու, թե արդյո՞ք Իտալիայի վճիռները, որոնք Գերմանիային պարտավորեցնում են անհատական ​​փոխհատուցում վճարել, համապատասխանում են միջազգային իրավունքին։

Այս որոշումները վերաբերում են Իտալիայի նացիստական ​​օկուպացիայի ժամանակ 1943 թվականի սեպտեմբերից մինչեւ 1945 թվականի մայիս ընկած ժամանակահատվածում կատարված հանցագործություններին։
Արդարադատության միջազգային դատարանի վճիռները պարտադիր բնույթ են կրում։ Միեւնույն ժամանակ, ՄԱԿ-ի դատարանը չունի իր որոշումներն ի կատար ածելու գործիքներ։