Henkel-ը հայտարարել է Բելառուսում իր գործունեության դադարեցման մասին

Գերմանական Henkel քիմիական արդյունաբերական ընկերությունն Ուկրաինայում իրադարձությունների ֆոնին որոշել է դադարեցնել բիզնեսը Բելառուսում։ Այս մասին ասվում է արտադրողի ուրբաթ հրապարակված հայտարարության մեջ։

Ընկերությունում հիշեցրել են, որ ապրիլի կեսերին Ուկրաինայում իրավիճակի կապակցությամբ Henkel-ը որոշել էր դադարեցնել գործունեությունը Ռուսաստանում։

«Բացի այդ, մենք որոշել ենք դադարեցնել մեր գործունեությունը Բելառուսում»,- հաղորդագրության մեջ մեջբերում է կոնցեռնի տնօրենների խորհրդի նախագահ Կարստեն Կնոբելի խոսքերը։ Ընդ որում, նշվում է, որ այդ քայլը կանդրադառնա տարեկան շուրջ 1 միլիարդ եվրոյի ընդհանուր վաճառքի վրա եւ կազդի ավելի քան 2.5 հազար աշխատակցի վրա։

Միեւնույն ժամանակ, Կնոբելն ընդգծել է, որ «չնայած առաջին եռամսյակում Henkel-ի վաճառքի ընդհանուր շատ լավ ցուցանիշներին, ընդհանուր տնտեսական իրավիճակը տարեսկզբից շարունակել է կտրուկ վատթարանալ»: Համավարակի հետեւանքով առաջացած համաշխարհային ճգնաժամի հետեւանքները, որոնք պայմանավորված էին հումքի շուկաներում եւ մատակարարման գլոբալ շղթաներում բացառիկ լարված իրավիճակով, նրա կարծիքով, ակնհայտորեն սրվել են Ուկրաինայում տեղի ունեցող իրադարձությունների ֆոնին։

«Այդպես, նյութերի եւ լոգիստիկայի գները կրկին զգալիորեն բարձրացել են»,- եզրափակել է Նոբելը:

Ապրիլի 19-ին Henkel-ը հայտարարել էր, որ ուկրաինական զարգացումների ֆոնին որոշել է հրաժարվել Ռուսաստանում իր բիզնեսից։ Ընդ որում, ընկերությունում վստահեցրել էին, որ Ռուսաստանից հեռանալու նախապատրաստության ընթացքում Ռուսաստանում ընկերության 2.5 հազար աշխատակից կշարունակի աշխատել եւ աշխատավարձ ստանալ։ Henkel-ը Ռուսաստանում 11 գործարաններում սոսինձներ, լվացող միջոցներ, կոսմետիկա եւ անձնական խնամքի միջոցներ է արտադրում: Մարտի սկզբին Henkel-ը դադարեցրել էր բոլոր ներդրումները, ինչպես նաեւ գովազդային եւ հովանավորչական գործունեությունը Ռուսաստանում՝ Ուկրաինայում ռուսական ռազմական օպերացիայի պատճառով: