Ով ասի, որ դրոշ չտեղադրելը դավաճանություն է, ստորի ծնունդ է․ Հյուսիսային համալսարանի ռեկտորը թույլ չտվեց դրոշ տեղադրել

Երիտասարդները այսօր՝ ապրիլի 28-ին շարունակել են իրազեկման ակցիա իրականացնել երևանյան բուհերում։ Նրանք փորձեցին Արցախի դրոշ տեղադրել Հյուսիսային համալսարանում, սակայն նրանց թույլ չտվեցին և հորդորեցին դուրս բերել դրոշը համալսարանի տարածքից՝ նշելով, որ համալսարանը մասնավոր տարածք է։

Հյուսիսային համալսարանի ռեկտոր Մհեր Մակիչյանը երիտասարդներին ասաց՝ եթե դրոշ դրվելով հարց լուծվեր, միլիոն հատ դրված կլիներ. «Դուրս եկեք համալսարանից, դուք չպետք է որոշեք, թե որ դրոշը որտեղ կախվի: Գնացեք ձեր տանը կախի: Համալսարանը մասնավոր ուսումնական հաստատություն է, այն չի կարող հանրային վայր հանդիսանալ, որ ցանկացած ակցիայի շրջանակներում մարդիկ մտնեն, ինչ ուզեն, անեն։ Ինչքան էլ ձեր քայլը ազգանվեր լինի, դուք ապօրինի մտաք շենք։ Եթե Արցախի դրոշը դնելով հարցը լուծվեր, հանրապետության մեծ մասի պատշգամբներից դրոշը կախած կլիներ։

Ձեր քայլը մեր համալսարանում իրագործելու համար ոչ նպատակահարմար ենք գտնում։ Եթե մեկը կարող է ինձ ապացուցել, որ դրոշ չդնելը դավաճանություն է, ինքը ստորի ծնունդ է, գնացեք այդ ակցիան ձեր միջավայրում արեք, սա մասնավոր հաստատություն է»,- ասաց ռեկտորը։

Ակցիայի մասնակիցներից մեկը բարձրախոսով դիմելով բուհի ուսանողներին, հայտարարեց. «Ձեր համալսարանի ղեկավարը թույլ տտվեց, որ Արցախի դրոշը տեղադրվի, այսինքն ձեր ղեկավարը թրքամետ էեւ համաձայն է, որ Արցախը լինի Ադրբեջանի կազմում»: Ներկաները սկսեցին վանկարկել «ամոթ»:

Երիտասարդները համալսարանի բակում տեղադրեցին դրոշը, կարմիր ծուխ բաց թողեցին և շարունակեցին իրենց ակցիան։ Նրանք վանկարկում էին «Արցախ», «Նիկոլ դավաճան»: