Ամերիկացի դեմոկրատները սարսափած են Մասկի կողմից Twitter-ի գնման պատճառով

44 միլիարդ դոլարով Twitter-ը գնելու եւ ընկերությունը սեփականաշնորհելու Իլոն Մասկի գործարքը տագնապալի է ԱՄՆ դեմոկրատների համար, որոնք մտահոգված են, որ նախկին նախագահ Դոնալդ Թրամփը կվերադառնա սոցիալական ցանցի իր երբեմնի սիրելի հարթակ, գրում է The Hill-ը:

Մասկը դժգոհել է, որ Twitter-ի մոդերատորները չափազանց հեռուն են գնացել խոսքը հարթակում կարգավորելու հարցում, որը նա անվանել է «քաղաքի թվային հրապարակ, որտեղ քննարկվում են մարդկության ապագայի համար կենսական նշանակություն ունեցող հարցեր»: Մասկը նշել է, որ ցանկանում է «Twitter-ն ավելի լավը դարձնել, քան երբեւէ՝ արտադրանքին նոր հնարավորություններ ավելացնելով»:

Լուրը զայրացրել է դեմոկրատներին, որոնք վախենում են, որ ապատեղեկատվության ավելի քիչ սահմանափակումներ կլինեն:

«Մասկի կողմից Twitter-ի գնումը վտանգավոր է մեր ժողովրդավարության համար։ Սա հիշեցում է այն մասին, թե ինչու է մեզ անհրաժեշտ հարստության հարկը եւ ինչու է մեզ անհրաժեշտ մեծ տեխնոլոգիաների համար լուրջ կարգավորումը: Մի միլիարդատերը չպետք է կարողանա աշխարհը տակնուվրա անել միայն այն պատճառով, որ նա ուրիշ կանոններով է խաղում»,- ասել է սենատոր Էլիզաբեթ Ուորենը, որը կարծում է, որ կառավարությունը պետք է մասնատի խոշոր տեխնոլոգիական ընկերությունները, որպեսզի նպաստի ավելի մեծ մրցակցությանը:

«Նա ասել է, որ ցանկանում է (Twitter-ը) հայտարարությունների գլոբալ տախտակ դարձնել: Նրան ուղղված իմ առաջին հարցն է՝ «Հայտարարությունների ձեր տախտակի վրա Դոնալդ Թրամփը կլինի՞»,- ասել է սենատոր Դիկ Դուրբինը: «Սա կարեւոր հարց է։ Եթե նա թույլ տա այս մարդուն բարբաջել եւ զառանցել Twitter-ում, ապա դա Ամերիկայի շահերից չի բխում»:

Դուրբինը, որը նախագահում է Սենատի դատական հանձնաժողովում, նշել է, որ իր եւ մյուս հանձնաժողովներն ուսումնասիրում են խոշոր տեխնոլոգիական ընկերությունների համար նոր կանոններ սահմանելու հնարավորությունը, որպեսզի դրդեն նրանց ավելին անել բովանդակությունը չափավորելու համար:

Սենատում հետախուզության հարցերով հանձնաժողովի նախագահ Մարկ Ուորներն ասել է, որ ինքը նաեւ մտահոգված է, թե Մասկի կողմից Twitter-ի գնումը ինչ կարող է նշանակել հարթակի բովանդակության չափանիշների համար: «Ես որոշ մտահոգություններ ունեմ։ Կարծում եմ, որ այն պետք է անցնի… համապատասխան կարգավորիչ [ստուգման] մակարդակը, եւ ես իմ որոշ ստուգումներն եմ անում»,- ասել է նա:

Սենատոր Ջեֆ Մերքլին կարծում է, որ քաղաքական բանավեճերի հիմնական ֆորումի նկատմամբ Մասկի վերահսկողությունը անհանգստացնող է: «Միշտ մտահոգիչ է, երբ օլիգարխը կարող է տիրել քաղաքի հրապարակին: Կարծում եմ՝ մենք իսկապես պետք է մեծ ուշադրություն դարձնենք, թե ինչպես են այն կառավարում»,- ասել է նա:

Դեմոկրատական քաղաքականության եւ հաղորդակցությունների հանձնաժողովի նախագահ, սենատոր Դեբի Ստաբենոուն ասել է, որ Թրամփի վերադարձը Twitter մեծ խնդիր կլինի:

Թրամփն ինքը, ով բացել է իր սեփական սոցիալական ցանցը, Fox News-ին ասել է, որ չի պատրաստվում վերադառնալ Twitter։ «Ես չեմ օգտագործի Twitter-ը, ես կմնամ Truth-ում»,- ասել է նա՝ նկատի ունենալով հաղորդագրությունների փոխանակման իր Truth Social հարթակը:

2021 թվականի հունվարին Կապիտոլիումի անկարգություններից հետո Twitter-ն ընդմիշտ արգելափակել է Թրամփին։