Պետդեպարտամենտը Թուրքիային կոչ է արել ազատ արձակել ցմահ դատապարտված Քավալային

ԱՄՆ պետդեպարտամենտը Թուրքիային կոչ է արել ազատ արձակել ցմահ դատապարտված իրավապաշտպան Օսման Քավալային։

«ԱՄՆ-ը խորապես մտահոգված եւ հիասթափված է դատարանի վճռից։ Մենք նորից կոչ ենք անում Թուրքիային ազատ արձակել Օսման Քավալային»,- նշվել է ԱՄՆ պետդեպարտամենտի մամուլի ծառայության ղեկավար Նեդ Փրայսի տարածած գրավոր հայտարարությունում։

«Մենք կոչ ենք անում [հանրապետության] կառավարությանը՝ պահպանել Թուրքիայի բոլոր քաղաքացիների իրավունքներն ու ազատությունները եւ դադարեցնել քաղաքականացված հետապնդումները»,- ավելացրել է պետդեպարտամենտի ներկայացուցիչը։

Քավալային դատել են սահմանադրական կարգը, ինչպես նաեւ Թուրքիայի գործող կառավարությանը տապալելու փորձի համար։ Երկրի իշխանությունները կարծում են, որ իրավապաշտպանը հանցակից է 2013թ. տեղի ունեցած բողոքի ցույցերին։ Գործով անցնող յոթ այլ մեղադրյալներ ստացել են 18 տարվա բանտարկություն։ Դատարանը, սակայն, Քավալային արդարացրել է լրտեսության մեղադրանքների մասով։

Անցած տարվա հոկտեմբերին Գերմանիայի, Դանիայի, Կանադայի, Նիդեռլանդների, Նոր Զելանդիայի, Նորվեգիայի, ԱՄՆ-ի, Ֆինլանդիայի, Ֆրանսիայի եւ Շվեդիայի դեսպանները Թուրքիային կոչ էին արել ազատ արձակել Քավալային, ինչից հետո հանրապետության նախագահ Ռեջեփ Թայիփ Էրդողանը ԱԳՆ-ին հանձնարարել էր այդ դիվանագետներին պերսոնա նոն գրատա հայտարարել։ Ավելի ուշ նշված երկրների դիվանագիտական առաքելությունները հայտարարել էին, որ մտադիր են հարգել թուրքական օրենքները եւ երկրի ղեկավարության որոշումները։ Դրանից հետո կոնֆլիկտը հարթվել էր։

Այս տարվա փետրվարին Ստամբուլի դատարանը ակտիվիստին արդարացնելու եւ ազատ արձակելու վճիռ էր կայացրել, բայց հետո, նույն օրը, նորից արտոնել էր նրա կալանավորումը։