ՌԴ-ից ԵՏՄ-ի երկրներ թռչողներին թույլ կտան գնումներ կատարել duty free-ում

Դաշնային մաքսային ծառայությունը (ԴՄԾ) եւ արդյունաբերության ու առեւտրի նախարարությունը դրական եզրակացություն են տվել այն բիզնես-առաջարկին, որով Ռուսաստանից Եվրասիական տնտեսական միության երկրներ թռչող ուղեւորներին թույլ կտրվի գնումներ կատարել անմաքսատուրք առեւտրի խանութներում։ Այս մասին գրել է «Ведомости» թերթը՝ հղում կատարելով ՌԴ կառավարությանը մոտ գտնվող աղբյուրին։

Ինչպես գրել է պարբերականը, 2019թ. ԵՏՄ-ում ուժի մեջ է մտել նորմ, որը ներմիութենական ուղեւորներին թույլ է տալիս գնումներ կատարել անմաքսատուրք առեւտրի խանութներում՝ միության այլ երկրներ (Հայաստան, Բելառուս, Ղազախստան եւ Ղրղըզստան) թռչելիս։ ԵՏՄ-ի Մաքսային օրենսգիրքը թույլ է տալիս duty free ապրանքներ ձեռք բերել ֆիզիկական այն անձանց, որոնք Միության մի երկրից մյուսն են թռչում։ Ընդ որում՝ ՌԴ օրենսդրությունում կա «ոչ կոռեկտ ձեւակերպում», որը բացառում է duty free ապրանքների վաճառքի հնարավորությունը Ռուսաստանից թռչող ներմիութենական ուղեւորների համար, նշվել է ԴՄԾ-ի՝ կառավարությանն ուղղված պատասխանում (թերթն ունի այդ պատասխանը)։

ԴՄԾ-ն առաջարկել է փոփոխություններ մտցնել «ՌԴ-ում մաքսային կարգավորման մասին եւ առանձին օրենսդրական ակտերում փոփոխություններ մտցնելու մասին» օրենքի 380-րդ հոդվածում, որով սահմանվում են այն պահանջները, որոնք վերաբերում են անմաքսատուրք առեւտրի խանութների գտնվելու վայրերին։ Դրա համաձայն՝ առեւտրի սրահները պետք է գտնվեն այնպիսի տեղերում, որպեսզի Ռուսաստանից չմեկնող ուղեւորները չկարողանան այնտեղ ապրանքներ ձեռք բերել։ ԴՄԾ-ի ներկայացուցիչը հաստատել է, որ ծառայությունն առաջարկում է համապատասխան փոփոխություններ մտցնել օրենքում՝ հավաստիացնելով, որ օրենսդրական նախաձեռնության իրավունքը այս դեպքում պատկանում է ֆինանսների նախարարությանը։

Ֆինանսների նախարարության ներկայացուցիչը «Ведомости»-ին տեղեկացրել է, որ գերատեսչությունը պաշտպանում է բիզնես-առաջարկը, քանի որ առաջարկվող փոփոխությունները կմեծացնեն duty free խանութների շրջանառությունը՝ միջազգային ուղեւորափոխադրումների նվազման պայմաններում։ Նախարարության ներկայացուցիչը թերթին տեղեկացրել է, որ արդյունաբերության եւ առեւտրի նախարարությունը նույնպես պաշտպանում է նախաձեռնությունը։ Նա ավելացրել է, որ օրինագծի մշակմամբ զբաղվում է ֆինանսների նախարարությունը, նախատեսվում է նախաձեռնությունը կառավարություն ներկայացնել մայիսի կեսին։ Ինչպես «Ведомости»-ին տեղեկացրել է դաշնային պաշտոնյան, նախաձեռնությունը քննարկվում է, բայց դեռեւս չի ներկայացվել ԵՏՄ Խորհրդի դիտարկմանը։