Ռուսական էներգակիրների նկատմամբ լայնածավալ էմբարգոյի մասին խոսակցությունները խուճապ են սերմանում Գերմանիայում, որը մինչ ուկրաինական ճգնաժամը իր գազի ներկրման 55 տոկոսը Ռուսաստանից էր ստանում

Ռուսական էներգակիրների նկատմամբ լայնածավալ էմբարգոյի մասին խոսակցությունները խուճապ են սերմանում Գերմանիայում, որը մինչ ուկրաինական ճգնաժամը իր գազի ներկրման 55 տոկոսը Ռուսաստանից էր ստանում։ Մտահոգությունն այն է, որ գազի ցանկացած հանկարծակի անջատում կարող է կաթվածահար անել ազգային բիզնեսի խոշոր բաղադրիչները: Քիմիական նյութերի միացության BASF խմբի ղեկավար Մարտին Բրուդերմյուլլերն ասել է, որ դա կարող է գերմանական ձեռնարկություններին ներքաշել «Երկրորդ համաշխարհային պատերազմից հետո վատագույն ճգնաժամի մեջ», գրում է Financial Times-ը:

«Հենց այս մտահոգությամբ է բացատրվում Գերմանիայի խորը հակակրանքը ռուսական գազի փակման գաղափարի նկատմամբ։ Ապրիլի սկզբին կանցլեր Օլաֆ Շոլցը Բունդեսթագին տեղեկացրել էր, որ Գերմանիայի կախվածությունը Ռուսաստանից «աճել է տասնամյակների ընթացքում եւ հնարավոր չէ դադարեցնել մեկ օրում»։

Միեւնույն ժամանակ, Գերմանիան նաեւ կանգնած է այն վտանգի առաջ, որ Ռուսաստանն ինքը կարող է հակահարված տալ Արեւմուտքի պատժամիջոցներին՝ միակողմանի դադարեցնելով գազի հոսքը դեպի Եվրոպա: Ամեն դեպքում Բեռլինը բախվել է այնպիսի իրավիճակի հետ, որ նույնիսկ մի քանի շաբաթ առաջ աներեւակայելի էր՝ գազի անջատումը ցնցում կառաջացնի, որը կստիպի երկրներին կրճատել բիզնեսի կենսական ուժերը եւ երկրի մի քանի խոշորագույն գործարաններ կփակի:

Էներգետիկայի ոլորտի վետերանները տարակուսած են։ «Ես շատ խափանումներ եմ տեսել», - ասում է գերմանական Eon խմբի գլխավոր կառավարիչ Լեոնհարդ Բիրնբաումը: «Ես տեսել եմ «Ֆուկուսիման»․․․ Ես տեսել եմ բուռն ժամանակներ։ Բայց այն, ինչ տեսնում ենք հենց հիմա․․․ աննախադեպ է»:

Գերմանական ընկերությունները պնդում են, որ էմբարգոն աղետալի հետեւանքներ կունենա։ BDI-ի ստորաբաժանման ղեկավար Զիգֆրիդ Ռուսվուրմն ասում է, որ գազի ներկրման հանկարծակի արգելքը բիզնեսի ամբողջական հատվածներ կկանգեցնի եւ «լուրջ վնաս կհասցնի Գերմանիայի ամենամեծ ուժին, այդ թվում՝ միջազգային հակամարտություններում, նրա տնտեսական հզորությանն ու կայունությանը»:

Աստիճանական ռազմավարության վրա պնդելով՝ իշխանությունները աջակցություն են ստացել Գերմանիայի մի քանի առաջատար տնտեսագետներից։ Առաջատար ֆինանսական հաստատությունների կողմից ապրիլի 13-ին հրապարակված կանխատեսման մեջ ասվում է, որ ԵՄ-ի լիակատար էմբարգոն կհանգեցնի կտրուկ ռեցեսիայի Գերմանիայում, ինչի հետեւանքով 12 ամսում արտադրության ծավալը 2,2 տոկոսով կնվազի եւ ավելի քան 400 000 աշխատատեղ կկորչի:

«Գերմանիան 2022 եւ 2023 թվականներին տնտեսական արտադրության 220 մլրդ եվրո կկորցնի, որը համարժեք է համախառն ներքին արդյունքի 6,5 տոկոսին»,- ասել է Ստեֆան Կուտսը՝ Քիլի Համաշխարհային տնտեսագիտության ինստիտուտից:

Գերմանիայի ՀՆԱ-ն վերջին եռամսյակում կրճատվել է համաշխարհային մատակարարումների շղթայում խցանումների հետեւանքով առաջացած լարվածության պատճառով, եւ, ի տարբերություն ԱՄՆ-ի, Չինաստանի, Մեծ Բրիտանիայի ու ընդհանուր առմամբ եվրոգոտու, Գերմանիան չի վերադարձել արտադրության մինչհամավարակային մակարդակներին»: