Իսրայելի կենտրոնական բանկը չինական յուան կավելացնի իր պահուստներին

Իսրայելի կենտրոնական բանկը չինական յուան կավելացնի իր պահուստներին՝ կրճատելով դոլարի եւ եվրոյի ակտիվները՝ իր պահուստները դիվերսիֆիկացնելու եւ ներդրումային հորիզոնը մեծացնելու համար, հայտնում է Bloomberg-ը։

«Մենք պետք է հաշվի առնենք պահուստներից եկամուտ ստանալու անհրաժեշտությունը, որը կփակի պարտավորությունների ծախսերը»,- ասել է Իսրայելի բանկի կառավարչի տեղակալ Էնդրյու Աբիրը:

Բացի յուանից, բանկը կավելացնի նաեւ կանադական եւ ավստրալիական դոլարները՝ ազդարարելով «բանկի ներդրումային խորհրդատվություների եւ փիլիսոփայության» փոփոխության մասին», ասել է Աբիրը: Նախկինում Իսրայելի Կենտրոնական բանկում պահվում էր միայն ԱՄՆ դոլար, եվրո եւ բրիտանական ֆունտ։

Ըստ բանկի տարեկան հաշվետվության՝ հետագայում յուանը կզբաղեցնի բանկի պահուստների 2 տոկոսը, իսկ կանադական եւ ավստրալիական արժույթները՝ 3,5-ական տոկոսը:

Նոր հավելումները նշանակում են, որ եվրոյի մասնաբաժինը 30 տոկոսից կնվազի 20 տոկոսի, իսկ դոլարի մասնաբաժինը 66,5 տոկոսից կդառնա 61 տոկոս։

Արժույթի միջազգային հիմնադրամի տվյալներով՝ համաշխարհային արժութային ընդհանուր պահուստներում դոլարի մասնաբաժինն ընկել է մինչեւ վերջին 20 տարվա ամենացածր մակարդակը, ինչը չինական յուանի աճի հարցում սպեկուլյացիաներ է առաջացրել:

Չինաստանը վաղուց պնդում է, որպեսզի յուանը փոխարինի դոլարին որպես պահուստային արժույթ: Փորձագետները նշում են, որ ամերիկյան արժույթը ռուսական ֆինանսական կառույցների դեմ զենքի վերածելը նշանակում է, որ կտրուկ փոփոխություններ են սպասվում։

Բայց որպեսզի չինական յուանը էլ ավելի բարձրանա, մյուս երկրները պետք է կորցնեն վստահությունը ԱՄՆ-ի տնտեսության նկատմամբ եւ վստահություն տածեն Չինաստանի դրամավարկային իշխանությունների նկատմամբ:

«Նախկինում եւս դոլարի դեմ մարտահրավերներ են եղել, բայց դրանցից ոչ մեկը չի դիմացել, քանի որ երբ իրավիճակը դառնում է անկայուն, ԱՄՆ-ը սովորաբար մնում է կայուն, ուստի դոլարը դիմակայում է»,- ասել է ինսայդեր տնտեսագետ Ալեքսանդր Տոմիչը: