Ձկնորսները մարդու չափ հսկայական ձողաձուկ են բռնել

Բրիտանացի ձկնորսները Իսլանդիայի ափերի մոտ հսկայական ձողաձուկ են բռնել, այն մեծահասակ մարդու չափ է, հայտնում է Metro-ն:

Բախտը ժպտացել է Bergey-ի անձնակազմին։ 180 սանտիմետր երկարությամբ եւ 51 կիլոգրամ քաշով ձողաձուկը երկուշաբթի՝ ապրիլի 11-ին, առաքվել է Լինքոլնշիրի կոմսության Գրիմսբի նավահանգստային քաղաք: Մասնագետները չեն բացառում, որ դա հյուսիսային Ատլանտիկայում բռնված այս տեսակի ամենամեծ ներկայացուցիչն է։

Ծովամթերքների վաճառական Նաթան Գոդլին, որը գնել է հսկայական ձողաձուկը 165 ֆունտ սթեռլինգով, պնդում է, որ երբեք նման մեծ նմուշի չի հանդիպել: Ավելին, նա վստահ է, որ ձուկը բռնելու լուրերից հետո ինչ-որ մեկը խմբագրել է այս տեսակի մասին «Վիքիպեդիա»-ի հոդվածը եւ ձողաձկան առավելագույն քաշը 40-ից փոխել 50 կիլոգրամի։

Ռեկորդային ձուկը գնելուց հետո Գոլդին այն ցուցադրել է իր խանութի ցուցափեղկում, այնուհետեւ հազվագյուտ որսը սթեյքերի է վերածել եւ հյուրասիրել հարազատներին ու գործընկերներին։