Գերմանիայի նախագահին ընդունելու Կիևի մերժումը տարակուսանք է առաջացնում․ Օլաֆ Շոլց

Գերմանիայի կանցլեր Օլաֆ Շոլցը չի նախատեսում մոտ ապագայում այցելել Կիեւ։

RBB ռադիոյին տված հարցազրույցում Շոլցը հիշեցրել է, որ պատերազմի սկսվելուց ընդամենը մի քանի օր առաջ այցելել է Կիեւ եւ պարբերաբար հեռախոսազրույցներ է ունեցել Ուկրաինայի նախագահ Վլադիմիր Զելենսկու հետ։ Դժվար թե գտնվի պետության կամ կառավարության մեկ այլ ղեկավար, որը նման ինտենսիվ կապ է պահպանում նրա հետ, նշել է Շոլցը։

Նա ասել է, որ Գերմանիայի նախագահ Ֆրանկ-Վալտեր Շտայնմայերին ընդունելու Կիեւի մերժումը տարակուսանք է առաջացնում։ Շտայնմայերն ինքը կցանկանար մեկնել Ուկրաինա եւ այցելել Զելենսկուն, ասել է Շոլցը, սակայն այլ մեկնաբանություններ չի տվել։

Նշենք, որ Գերմանիայի նախագահը նախօրեին հաստատել էր, որ Կիեւը հրաժարվել է ընդունել իրեն՝ հաստատելով Bild տաբլոիդում հրապարակումը, որը, վկայակոչելով ուկրաինացի դիվանագետին, հաղորդել էր, որ դրա պատճառը Շտայնմայերի ակտիվ կապերն են Մոսկվայի հետ։

Միեւնույն ժամանակ, այսօր CNN-ին տված հարցազրույցում Ուկրաինայի նախագահի աշխատակազմի ղեկավարի խորհրդական Սերգեյ Լեշչենկոն հերքել է տեղեկությունն այն մասին, որ Զելենսկին մերժել է Գերմանիայի նախագահի այցի առաջարկը։

Ուկրաինայի նախագահի խորհրդական Ալեքսեյ Արեստովիչը գերմանական հանրային հեռուստատեսությանը հայտնել է, որ Զելենսկին Բեռլինին վիրավորելու մտադրություն չի ունեցել։

«Կարծում եմ, որ հիմնական փաստարկն այլ է եղել՝ մեր նախագահը սպասում է կանցլերին, որպեսզի նա (Շոլցը) կարողանա ուղղակի գործնական որոշումներ կայացնել, ներառյալ զենքի մատակարարումը»,- ասել է նա ZDF հեռուստաալիքին։