Բորիս Ջոնսոնը տուգանվել է լոքդաունի ժամանակ երեկույթներ կազմակերպելու համար

Լոնդոնի ոստիկանությունը տուգանքներ է գրել Մեծ Բրիտանիայի վարչապետ Բորիս Ջոնսոնին եւ Բրիտանիայի գանձապետարանի կանցլեր Ռիշի Սունակին կորոնավիրուսի համավարակի պատճառով մտցված հակաքովիդային սահմանափակումները խախտելու համար։ 2020թ. հունիսի 19-ին Ջոնսոնն իր ծննդյան օրը նշել էր կառավարության շենքում երեկույթ կազմակերպելով՝ խախտելով իր իսկ հայտարարած լոքդաունը։

Ինչպես հայտարարել է Բրիտանիայի կառավարության ղեկավարն ապրիլի 12-ին, նա արդեն վճարել է տուգանքը եւ ներողություն խնդրել կատարվածի համար։ «Պետք է ասեմ ամենայն անկեղծությամբ. այն ժամանակ չէի մտածել, որ դա կարող է կանոնների խախտում լինել։ Բայց, իհարկե, ոստիկանությունը հակառակն է սահմանել, եւ ես լիովին հարգում եմ նրանց հետաքննության արդյունքները»,- ասել է Ջոնսոնը BBC-ի հարցազրույցում։

Ջոնսոնը Մեծ Բրիտանիայի առաջին վարչապետն է, որին ծառայողական պարտականությունները կատարելու ժամանակ պատժել են օրենքը խախտելու պատճառով։ Ընդ որում՝ հրաժարական տալ, ինչպես պահանջում էր ընդդիմությունը, նա հրաժարվել է։

Դաունինգ սթրիթում, կառավարության շենքում, չնայած հակաքովիդային խիստ կանոններին, երեկույթների անցկացման մասին առաջին տեղեկությունները ի հայտ են եկել 2021թ. դեկտեմբերին։

Ինչպես տեղեկացվել էր, 2020թ. հունիսի 19-ին Ջոնսոնի ծննդյան օրվա կապակցությամբ 30 հյուր էր հավաքվել։ Այդ ժամանակ երկրում գործում էր լոքդաունի ռեժիմը, բաց օդում թույլատրված էր հավաքվել վեց հոգուց ոչ ավելի։ Դաունինգ սթրիթի ներկայացուցչի խոսքով՝ Ջոնսոնը երեկույթին ներկա է գտվել «տասը րոպեից ոչ ավելի»։

Ավելի ուշ Բրիտանիայի վարչապետը, ներողություն խնդրելով, խորհրդարանում խոստովանել էր, որ ներկա է եղել նաեւ այգում 2020թ. մայիսի 20-ի երեկույթին, երբ համավարակի պատճառով անգամ բաց օդում արգելված էին երկուսից ավելի մարդկանց հանդիպումները։

BBC-ի տվյալներով՝ ոստիկանությունը հետաքննում է կարանտինային սահմանափակումների խախտումները Դաունինգ սթրիթում եւ կառավարական այլ շենքերում տեղի ունեցած 12 երեկույթների ժամանակ։ Ավելի քան 50 տուգանք է սահմանվել։