Ոչ ոք չի ցանկանում գնել առանձնատունը, որի առաստաղին Կարավաջոյի որմնանկարն է

Հռոմեական «Ավրորա» առանձնատունը, որի առաստաղին Կարավաջոյի միակ որմնանկարն է, աճուրդում երկու անգամ ձախողվել է: Այն չեն ցանկանում նույնիսկ 20 տոկոս զեղչով գնել, գրում է Artnet-ը։

Առաջին անգամ առանձնատունը վաճառքի դրվել է հունվարին՝ 471 մլն եվրոյով։ Այն ժամանակ գնորդ չէր գտնվել, եւ ապրիլին այն կրկին հայտնվել է աճուրդում՝ 282 մլն եվրո մեկնարկային գնով, սակայն նորից գնման առաջարկներ չեն եղել։

Այս առանձնատունը կառուցվել է 1570թ․՝ որպես կարդինալներից մեկի որսորդական տնակ։ 1597թ․ առաջին սեփականատերը Կարավաջոյին որմնանկար է պատվիրել։ Նկարիչն այն նկարել է յուղաներկով՝ մի սենյակի առաստաղին: Նկարը պատկերում է հռոմեական աստվածներ Յուպիտերին, Նեպտունին եւ Պլուտոնին։

Երկար տարիներ որմնանկարը թաքնված է եղել հանրության աչքից, եւ նորից հայտնաբերվել է միայն 1960-ականներին՝ շենքի վերանորոգման ժամանակ։ Առանձնատան ներսում կա նաեւ Գվերչինոյի որմնանկարը, որում պատկերված է աստվածուհի Ավրորան։ Նրա պատվին էլ անվանել են կալվածքը:

Բացի այդ, առանձնատան նոր սեփականատերը կդառնա բազմաթիվ արժեքավոր արտեֆակտների՝ Գալիլեոյի աստղադիտակի, Մարի Անտուանետի նամակների եւ Միքելանջելոյի քանդակի սեփականատեր:

Առանձնատունն աճուրդի է հանվել դատարանի վճռով, որն ընդունվել է, երբ այն ժառանգության համար պայքարի առարկա է դարձել արքայազն Նիկոլո Բոնկոմպանիի այրու եւ որդիների միջեւ։ Արքայազնը մահացել է 2018թ.։ Նրա նախնիներն առանձնատունը 1621-ին են գնել։

Այժմ Իտալիայում ստորագրահավաք է շրջանառվում, որը կոչ է անում կառավարությանը գնել տունը, որպեսզի այն պատկանի ոչ թե մասնավոր անձի, այլ պետությանը։