«Մենք կզգանք նրանց բացակայությունը». Իտալիան վախենում է տնտեսական հարվածից ռուսների բացակայության պատճառով

Զբոսաշրջության ոլորտը, գինեգործները եւ շքեղ ապրանքներ արտադրողներն անկում են սպասում, քանի որ Իտալիան աջակցում է Ուկրաինային, գրում է The Guardian-ը։

«Արևելյան Տոսկանայի Արեցո քաղաքի ծխախոտի խանութի ցուցափեղկու կարմիր մակագրությամբ դեղին ցուցանակ է՝ «Վճարներն ընդունում ենք միայն ռուբլով» գրությամբ:

«Դա պարզապես սադրանք է»,- հայտարարել է խանութի սեփականատեր Էնթոնի Բրուկատոն՝ նշելով, որ նույն ցուցափողկում Ուկրաինայի կապտադեղին դրոշը եւ աղավնու նկարը՝ կտուցին խաղաղության դրոշով: «Ես ուզում եմ, որ մարդիկ խոսեն այն մասին, թե ինչ է կատարվում: Մի քանի առաջնորդներ կան, ովքեր միլիոնավոր մարդկանց վրա ազդող որոշումներ են կայացնում: Դա խելագարություն է»:

Չնայած Բրուկատոն քննադատում է ռուսական ներխուժումը, սակայն խոստովանում է, որ իր ցուցափեղկը կարող է որպես ոչ միանշանակ ուղերձ ընկալվել: Եւ նա միակը չէ:

Իտալիան պատժամիջոցներ է սահմանել ռուսական տնտեսության դեմ, դադարեցրել է ռուսական բանկերի հետ աշխատանքը եւ կոչ է արել կարգավորել հակամարտությունը բանակցային ճանապարհով: Սոցհարցումները ցույց են տալիս, որ իտալացիների 80-ից 90 տոկոսը կողմ է կառավարության դիրքորոշմանը, վկայում են Opinioni հետազոտական ​​ընկերության տվյալները:

Այնուամենայնիվ, երկիրը դեռ մեծապես կախված է ռուսական գազի ներկրումից, թեեւ Իտալիայի վարչապետ Մարիո Դրագին կտրականապես հրաժարվել է ռուբլով վճարել գազի դիմաց:

Վերլուծաբաններն ասում են, որ իտալական ապրանքների ռուսական ներմուծման եւ ռուս այցելուների բացակայությունը կարող է խաթարել Իտալիայի փխրուն տնտեսական վերականգնումը համավարակից հետո: Մարտի վերջին Economist Intelligence Unit-ը նվազեցրել էր ԵՄ-ում տնտեսական աճի իր գնահատականները, սակայն նշել էր, որ Իտալիան ամենից շատ կտուժի, քանի որ այս տարի աճը կդանդաղի մինչեւ 3.4 տոկոս՝ նախորդ 4.4 տոկոս գնահատականի համեմատ՝ Ռուսաստանի հետ առեւտրին եւ երկրորդական ազդեցությունների պատճառով, ինչպիսիք են վառելիքի գների բարձրացումը եւ մատակարարման շղթայի հետ կապված խնդիրները: Սա համապատասխանում է Իտալիայի Ազգային վիճակագրական ինստիտուտի հայտարարությանն այն մասին, որ պատերազմը շարունակության դեպքում հետագա ճշգրտումներ են հնարավոր դեպի նվազում:

Federvini գինու ոլորտի ասոցիացիայի նախագահ Միքայելա Պալինին ասում է, որ Ուկրաինայում պատերազմը կարող է «անդառնալի երկարաժամկետ հետեւանքներ» ունենալ իտալացի գինեգործների համար: Նա նշել է, որ Իտալիան Ուկրաինա եւ Ռուսաստան գինիների ամենամեծ մատակարարն է՝ անցյալ տարի ընդհանուր մոտ 400 մլն եվրոյի վաճառքով, ինչը կազմում է իտալական գինու վաճառքի մոտ 6 տոկոսը։ Այս տարի արտահանումը կտրուկ կնվազի.

Շքեղ ապրանքների, այդ թվում՝ հագուստ, ոսկերչական իրեր եւ աքսեսուարներ արտադրողները նշել են, որ եւս արտահանման անկում են ակնկալում: Ֆորտե դե Մարմի ափամերձ հանգստավայրը, որը սպասարկում է ռուս գնորդներին եւ այցելուներին, կասեցրել է ընդլայնման ծրագրերը պատերազմի սկսվելուց օրեր անց

Հռոմի Լուիս համալսարանի բիզնեսի եւ կառավարման պրոֆեսոր Միքել Կոստաբայլի խոսքով՝ Իտալիայի զբոսաշրջության ոլորտը, որը վերջին երկու տարվա ընթացքում լոքդաուններ եւ կարանտիններ է տարել, ավելի ծանր հարված կհասցվի: Նա նշել է, որ թեեւ ռուսաստանցիները Իտալիա այցելուների թվով հազիվ են հայտնվել լավագույն 20-յակում, երկրում անցկացրած ժամանակով նրանք 9-րդն են, իսկ ընդհանուր տնտեսական ազդեցության առումով՝ երկրորդը՝ զիջելով միայն Գերմանիային:

«Ավանդաբար, միջին ռուսաստանցի այցելուն Իտալիայում մնում է հինգ եւ ավել օր՝ շատ այլ երկրներում երկու կամ երեք օրերի համեմատ, եւ նա օրական 65 տոկոսով ավելի շատ գումար է ծախսում, քան միջին զբոսաշրջիկը,- ասել է Կոստաբայլի:- Վստահեցնում եմ, որ մենք կզգանք ռուս այցելուների բացակայությունը»։

Հռոմում շքեղ ժամացույցների խանութի վաճառող Մարկ Անտոնիո Էսպոզիտոն ասել է, որ պատերազմի հետեւանքներն ակնհայտ էին հենց սկզբից: «Մեր ժամացույցների գները սկսվում են մոտ 5000 եվրոյից,- ասել է Էսպոզիտոն:- Մենք բավականին հարուստ հաճախորդներ ունեինք Ռուսաստանից, ուստի ռուսախոս աշխատակցի ընդունեցինք աշխատանքի: Բայց կարծում եմ, որ տարեսկզբից երկու-երեքից ավել ռուսաստանցի չեմ տեսել»: