Մերկ տղամարդը մտել է Ալմաթիի օդանավակայանի տարածք և վազել թռիչքուղով

Մերկ տղամարդը մտել է Ալմաթիի օդանավակայանի տարածք եւ վազել թռիչքուղով, տեղեկացրել է Tengrinews.kz-ը։

Սոցցանցերի տարածած տեսանյութում մերկ տղամարդը բարձրանում է մետաղական պատվարների վրայով։ Հաջորդ կադրերում երեւում է, թե ինչպես է նա արդեն գտնվում ինքնաթիռների կողքին։ Կադրերից ելնելով՝ դա Ալմաթիի օդանավակայանն է։ Հոլովակն ուղեկցվում է հոլիվուդյան կուլտային «Տերմինատոր» բլոկբաստերի սաունդթրեկով։

Ալմաթիի միջազգային օդանավակայանում հաստատել են, որ միջադեպն իսկապես տեղի է ունեցել օդանավակայանի տարածքում։

«Անծանոթը պատվարը հաղթահարելով մտել է օդանավակայան եւ վազել դեպի ինքնաթիռների կայանատեղի։ Օդանավակայանի ավիացիոն անվտանգության ծառայությունն անմիջապես բռնել է նրան եւ հանձնել ոստիկանության գծային բաժանմունքին։ Հետաքննություն է վարվում»,- տեղեկացրել են օդանավակայանի մամուլի ծառայությունում։

Ոստիկաններն ավելացրել են, որ միջադեպը տեղի է ունեցել անցած գիշեր։ Հոլովակի հերոսը 25-ամյա մի տղամարդ է։

«Սույն քաղաքացին ապրիլի 6-ին, ժամը 00.10-ին մոտ մերկացել է եւ տերմինալի մոտի պատվարին բարձրանալով՝ մտել Ալմաթիի օդանավակայան։ Նա վազել է դեպի թռիչքուղի։ Այստեղ նրան բռնել են ավիացիոն անվտանգության ծառայության աշխատակիցները»,- ասել են Տրանսպորտի ոստիկանության վարչությունում։

Նշվել է, որ կալանավորման պահին նրա պահվածքը ադեկվատ չի եղել։ Ավելի ուշ կատարված բուժզննումը հաստատել է, որ նա թեթեւակի հարբած է եղել։

«1997թ. ծնված տղամարդու նկատմամբ միանգամից երեք վարչական արձանագրություն է կազմվել։ Այն է՝ Վարչական իրավախախտումների մասին ՌԴ Քր. օր. հոդված 440. «Ալկոհոլային խմիչքներ օգտագործելը կամ հարբած վիճակում հանրային վայրում գտնվելը», հոդված 434. «Մանր խուլիգանություն» եւ 564՝ «Առանց թույլտվության օդանավակայանի տարածքում գտնվելը»,- ավելացրել են գերատեսչությունում։

Վարչական արձանագրությունների նյութերն ուղարկվել են դատարան՝ ըստ էության քննելու նպատակով։