Լեհաստանի կառավարությունը մոլի ռուսատյաց քաղաքականությանը զոհաբերում է իր քաղաքացիների բարեկեցությունը եւ սեփական տնտեսական շահերը

Լեհաստանի կառավարությունը մոլի ռուսատյաց քաղաքականությանը զոհաբերում է իր քաղաքացիների բարեկեցությունը եւ սեփական տնտեսական շահերը, Sputnik Polska գործակալության իր հոդվածում գրել է Ռուսաստանի Անվտանգության խորհրդի փոխնախագահ Դմիտրի Մեդվեդեւը։ Նա նշել է, որ դա տարածվում է այդ թվում նաեւ ռուսական գազի ռեւերսային մատակարարումների վրա, փոխանցել է «Прайм»-ը։

«Լեհաստանի տնտեսական շահերը եւ նրա քաղաքացիների բարեկեցությունը զոհաբերվում են մոլի ռուսատյաց քաղաքականությանը։ Լեհաստանի համար ամենացավագին հարցերից մեկը գազային նախագծերն են»,- գրել է Մեդվեդեւը։

Նա նշել է. «Լեհաստանի բնակիչներին մշտապես վախեցնում են այն բանով, որ Ռուսաստանն ուր որ է «գազային զենք» կկիրառի։ Իբր, Մոսկվան կորցրածը հետ կբերի դժբախտ գործընկերոջ հաշվին, որի էներգահամակարգը զգալիորեն կախված է էներգակիրների գնումից։

«2020թ. Վարշավան ներկրել է 10 մլրդ խորանարդ մետր ռուսական գազ, բայց հիմա մտադիր է հրաժարվել գործարքներից։ Ռուսաստանից Լեհաստան գազի մատակարարումների ծավալներն այս տարի, նախորդի համեմատ, արդեն նվազել են 13 տոկոսով։ Որպես փոխարինող միջոց առաջարկվել են այդ նույն ռուսական գազի ռեւերսային մատակարարումները, բայց Գերմանիայից, հեղուկացված բնական գազի ներմուծումները Կատարից, Նորվեգիայից եւ ԱՄՆ-ից։ Տնտեսական շահը զոհաբերվել է անհեթեթ քաղաքական որոշումներին։ Ոչ ամենահարուստ եւ ոչ ամենաբարգավաճ եվրոպական երկրի համար դա էական է»,- ավելացրել է քաղաքական գործիչը։

Մեդվեդեւը նաեւ հիշեցրել է. Վարշավան մի շարք քայլեր է նախաձեռնել, որոնք ուղղված են ռուսական «Հյուսիսային հոսք – 2» գազային նախագծի դեմ, ինչպես նաեւ նշել է ԵՄ-ի գազային ճյուղում ԱՄՆ-ի ընկերությունների ներկայության ընդլայնման մասին։

«Լեհաստանի երազանքն է՝ դառնալ եվրոպական հաբ ԱՄՆ-ից հեղուկացված բնական գազի (ՀԲԳ) մատակարարման դեպքում։ Կառուցվել եւ ընդլայնվում է Սվինոույսցիի տերմինալը ՀԲԳ-ն ընդունելու համար, նախատեսվում է կառուցել նույնպիսի տերմինալ Գդանսկի մոտ, գազային ինտերկապեր Լիտվայի եւ Սլովակիայի հետ, լեհ-դանիա-նորվեգական BalticPipe գազատարը»,- ավելացրել է ՌԴ-ի Անվտանգության խորհրդի փոխնախագահը։