Հազարավոր ֆունտ ստերլինգ արժեքով իրեր են գողացել․ Լոնդոնում կողոպտիչը ներխուժել է Դևիդ և Վիկտորյա Բեքհեմների առանձնատուն

Բեքհեմներին կողոպտել են։ Հանցագործը մուտք է գործել Լոնդոնում գտնվող նրանց առանձնատուն եւ հազարավոր ֆունտ ստերլինգ արժողությամբ իրեր գողացել։ The Sun-ի տեղեկություններով՝ գողը մուտք է գործել տան ննջասենյակներից մեկն այն ժամանակ, երբ Վիկտորյան, Դեւիդն ու նրանց 10-ամյա դուստրը՝ Հարփերը, քնած են եղել։

Կողոպտիչն այնքան լուռ է գործել, որ ոչ ոքի չի արթնացրել։ Գողության փաստը հայտնաբերել է Վիկտորյայի եւ Դեւիդի 17-ամյա որդին ընկերների հետ գիշերային զբոսանքից վերադառնալուց հետո։ Քրուզն արթնացրել է հորն ու պատմել, որ տան ննջասենյակներից մեկում ինչ-որ մեկը եղել է։ Դրանից հետո Դեւիդը զանգահարել է շտապ օգնության ծառայություն եւ որդու հետ սկսել է խուզարկել առանձնատունը։

«Բեքհեմները բավական պրոֆեսիոնալ գողերի զոհ են դարձել, որոնք գործունեություն են ծավալել այդ շրջանում։ Փառք Աստծո, հանցագործները հասել են ննջասենյակներից միայն մեկին»,- հայտնել է The Sun-ը։

Լոնդոնի ոստիկանությունը պարբերականի հետ զրույցում հաստատել է, որ հետաքննում է միջադեպը եւ հայտարարել է, որ պարզ չէ՝ արդյոք հանցագործը միայնակ է եղել, թե հանցակիցներ է ունեցել։