Արաբական կոալիցիան հայտարարել է Եմենի հուսիների դեմ նոր ռազմական գործողություն սկսելու մասին

Սաուդյան Արաբիայի գլխավորած կոալիցիան շաբաթ օրը ռազմական գործողություն է սկսել, որի նպատակն է դադարեցնել հարձակումներն իր նավթային օբյեկտների վրա եւ պաշտպանել աշխարհի էներգիայի աղբյուրները, հաղորդում է Reuters-ը՝ վկայակոչելով Սաուդյան Արաբիայի պետական ​​լրատվամիջոցները:

Կոալիցիան հայտարարել է, որ օդային հարվածներ է հասցնում Եմենի մայրաքաղաք Սանային եւ Հոդեյդա նավահանգստային քաղաքին, որը գտնվում է Եմենի «Անսար Ալլահ» շարժման ապստամբ հուսիների վերահսկողության տակ:

Արաբական կոալիցիայի հայտարարության համաձայն՝ դրա նպատակն է «պաշտպանել էներգիայի համաշխարհային աղբյուրները եւ ապահովել մատակարարման շղթաները»։

«Գործողությունը կշարունակվի այնքան ժամանակ, քանի դեռ չի հասել իր նպատակներին։ Գործողությունը վաղ փուլում է, եւ հուսիները պետք է պատասխանատվության ենթարկվեն իրենց թշնամական վարքագծի հետեւանքների համար»,- հայտնել է կոալիցիան:

Ավելի ուշ կոալիցիան հայտարարել է, որ Եմենի երկնքում որսացել եւ ոչնչացրել է երկու անօդաչու թռչող սարք, որոնք Հոդեյդայի նավթային օբյեկտներից արձակվել են Էր Ռիադի ուղղությամբ:

Կոալիցիան հայտարարել է, որ կխնայի քաղաքացիական թիրախները եւ կխուսափի նավթային օբյեկտների կողմնակի վնասներից:

Al Masirah TV-ն հաղորդում է, որ կոալիցիայի ռազմական ինքնաթիռները գրոհել են Հոդեյդա քաղաքը, եւ որ թռիչքները դեռ շարունակվում են, մինչդեռ բնակիչները Reuters-ին հայտնել են, որ հարձակումները տեղի են ունեցել Հոդեյդայի նավահանգստի մոտ:

Al Masirah TV-ն նաեւ հաղորդել է, որ կոալիցիան հարձակվել է Սալիֆ նավահանգստի, էլեկտրաէներգիայի կորպորացիայի եւ Հոդեյդայի նավթային օբյեկտների վրա:

Սանայի բնակիչները Reuters-ին հայտնել են, որ քաղաքի հարավում գտնվող Safer նավթային ընկերության շենքը ռմբակոծվել է: