ԵՄ-ն եւ ԱՄՆ-ն պատրաստվում են հրապարակել Եվրոպային ամերիկյան ՀԲԳ-ի մատակարարման գործարքը

ԵՄ-ն եւ ԱՄՆ-ն պատրաստվում են հրապարակել Եվրոպային ամերիկյան մեծ քանակությամբ հեղուկացված բնական գազի մատակարարման գործարքը, հաղորդում է Reuters-ը՝ հղում անելով աղբյուրներին:

ԱՄՆ նախագահ Ջո Բայդենը, ով հինգշաբթի մասնակցել է Բրյուսելում ԵՄ առաջնորդների գագաթաժողովին, խոստացել է, որ ԱՄՆ-ն այս տարի Եվրոպային կմատակարարի առնվազն 15 միլիարդ խորանարդ մետր ավելի շատ ՀԲԳ, քան նախատեսված էր։

Աղբյուրներից մեկը հավելել է, որ գործարքը կներառի նաեւ ԱՄՆ-ից ՀԲԳ-ի արտահանման ավելացում 2023թ․։

«Մենք ակնկալում ենք, որ եվրոպական ՀԲԳ-ի ներմուծմանն աջակցելու կարճաժամկետ միջոցառումները կախված կլինեն առկա մատակարարումների վերաբաշխումից», ասվում է Goldman Sachs-ի վերլուծաբանների զեկույցում։

Poten & Partners-ի բիզնես հետախուզության գլոբալ ղեկավար Ջեյսոն Ֆիերը հայտարարել է, որ ակնկալվում է, որ ՀԲԳ-ի արտահանման ոչ մեծ նոր հզորություններ կհայտնվեն Միացյալ Նահանգներում այս տարի: «Սակայն ԱՄՆ-ում գրեթե ամբողջ ՀԲԳ-ն արդեն ինչ-որ մեկի սեփականությունն է»,- ասել է Ֆիերը՝ նշելով, որ «եթե Եվրոպան ավելի շատ ՀԲԳ-ի կարիք ունենա, ապա ստիպված կլինի վճարել դրա համար»:

Ռուսաստանը դեպի ԵՄ գազի խոշորագույն մատակարարն է․ 2021թ․ ԵՄ է ուղարկել ընդհանուր առմամբ 155 միլիարդ խորանարդ մետր գազ։

Անցյալ տարի ԱՄՆ-ից ԵՄ արտահանումը գերազանցել է 22 միլիարդ խորանարդ մետրը։ ԱՄՆ արտահանողները երեք ամիս անընդմեջ Եվրոպա են առաքում ՀԲԳ-ի ռեկորդային ծավալներ, քանի որ այնտեղ գներն անցյալ տարվա համեմատ աճել են ավելի քան 10 անգամ:

Մոսկվան հայտարարել է, որ «ոչ բարեկամական» երկրները, ներառյալ ԵՄ անդամ երկրները, պետք է սկսեն ռուբլով վճարել ռուսական նավթի եւ գազի դիմաց, ինչը մտահոգություն է առաջացրել՝ կապված դեպի Եվրոպա գազի մատակարարման հնարավոր խափանումների հետ։

Հինգշաբթի ԵՄ որոշ առաջնորդներ ասել են, որ պահանջարկը չի համապատասխանում մատակարարման պայմանագրերին:

«Ամենուր կան ֆիքսված պայմանագրեր, որոնց մի մասն այն արժույթն է, որով պետք է վճարվեն մատակարարումները»,- ասել է Գերմանիայի կանցլեր Օլաֆ Շոլցը: «Շատ ժամանակ դա եվրո է կամ դոլար, դա այն հիմքն է, որի վրա մենք աշխատում ենք»,- ասել է նա։

«Ոչ ոք ռուբլով չի վճարի»,- ասել է Սլովենիայի վարչապետ Յանեզ Յանշան։

ԵՄ առաջնորդները պետք է այսօր՝ գագաթաժողովի երկրորդ օրը, պայմանավորվեն հաջորդ ձմռանը «համատեղ գազ, ՀԲԳ եւ ջրածին գնելու» շուրջ։

Այնուամենայնիվ, երկրները շարունակում են տարբեր կարծիքներ ունենալ ռուսական նավթի եւ գազի նկատմամբ ուղղակի պատժամիջոցներ կիրառելու հարցում։ ԵՄ-ի կողմից էմբարգոյի սահմանումը կպահանջի բոլոր 27 անդամ երկրների միաձայն հավանությունը:

«Էներգետիկ պատժամիջոցները միջոց են՝ Ռուսաստանի նախագահ Վլադիմիր Պուտինի ռազմական գանձարան փողերի հոսքը դադարեցնելու համար»,- ասել է Լատվիայի վարչապետ Արթուրս Կարինշը:

Գերմանիան, որին բաժին է ընկնում ռուսական գազի արտահանման 18 տոկոսը, եւ Հունգարիան դեմ են հանդես եկել՝ հղում անելով տնտեսական վնասին, որը կպատճառի նավթի էմբարգոն:

Իսպանիան, Բելգիան, Իտալիան, Հունաստանը եւ Պորտուգալիան առաջարկել են սահմանափակել էներգիայի գները եւ տարանջատել էլեկտրաէներգիայի եւ գազի գները՝ սպառողների վճարումները զսպելու համար:

Մյուս երկրները զգուշացնում են, որ մեծածախ գների սահմանափակումը խնդիրներ կառաջացնի եւ կխաթարի մաքուր էներգիայի անցմանն ուղղված ջանքերը: Համաեվրոպական ցանկացած որոշում, հավանաբար, կհետաձգվի մինչեւ այս ամիս էներգետիկայի հարցով կարգավորիչների զեկույցի հրապարակումը։