Դուբայի կառավարչի երեխաների խնամակալությունն ամբողջությամբ փոխանցվել է նրա նախկին կնոջը

Դուբայի կառավարիչ շեյխ Մոհամմեդ բեն Ռաշիդ ալ Մաքթումը ընտանեկան «անասելի» բռնության է ենթարկել իր նախկին կնոջը, վճռել է բրիտանացի բարձրաստիճան դատավորը՝ նրանց երեխաների խնամակալությունը փոխանցելով մորը, հայտնում է Reuters-ը։

Այս վճռով ավարտվում է Լոնդոնի Գերագույն դատարանում դաժան եւ չափազանց թանկարժեք եռամյա պայքարը Մոհամմեդի եւ նրա նախկին կնոջ՝ Հորդանանի թագավոր Աբդալլահի խորթ քրոջ՝ արքայադուստր Հայա բինթ ալ Հուսեյնի միջեւ:

Լոնդոնի դատարանը նախկինում որոշել էր, որ Դուբայի կառավարիչը ստիպել է Հայային վախենալ իր կյանքի համար, առեւանգել եւ բռնության է ենթարկել այլ ամուսնությունից երկու դուստրերին, ինչպես նաեւ հրամայել է կոտրել Հայայի եւ նրա փաստաբանների հեռախոսները։

Դատարանը նաեւ որոշել է, որ Արաբական Միացյալ Էմիրությունների փոխնախագահ եւ վարչապետ Մոհամմեդը ռեկորդային գումար՝ ավելի քան 554 մլն ֆունտ (730,50 մլն դոլար) պետք է տրամադրի երեխաների երկարաժամկետ անվտանգության եւ խնամքի համար:

Միայն Հայան կարող է որոշել զույգի երկու երեխաների կրթության ու առողջության հետ կապված բոլոր հարցերը, իսկ Մոհամմեդին այդ մասին ուղղակի կտեղեկացնեն, եզրափակել է դատավորը։

Երեխաների հետ նրա հարաբերությունները կսահմանափակվեն հեռախոսազանգերով ու հաղորդագրություններով այն բանից հետո, երբ ինքը՝ շեյխը, որոշել է նրանց հետ անմիջական շփում չունենալ։

Սոցիալական ապահովության որոշման հրապարակումը նշանավորում է այն գործի ավարտը, որը արժեցել է ավելի քան 70 մլն ֆունտ սթեռլինգ՝ փաստաբանների վարձատրության համար: