Իսրայելն ԱՄՆ-ին կոչ է արել հաստատել Եգիպտոսի հետ F-15 կործանիչների մատակարարման խոշոր գործարքը

Իսրայելը կոչ է արել Ջո Բայդենի վարչակազմին հաստատել Եգիպտոսի հետ F-15 կործանիչների խոշոր գործարքը, հաղորդում է Axios-ը՝ վկայակոչելով Իսրայելի պաշտպանության երկու բարձրաստիճան պաշտոնյաներին:

Իսրայելի լոբբիստական ​​ջանքերը վկայում են վերջին տարիներին իսրայելա-եգիպտական ​​հարաբերությունների խորության եւ Իսրայելի կողմից Վաշինգտոնի եւ Կահիրեի հարաբերությունների բարելավմանն ուղղված ջանքերի մասին:

Դեմոկրատներն ու հանրապետականները պահանջում են Բայդենից պայմաններ ներկայացնել Եգիպտոսին ռազմական օգնության մասով, այդ թվում՝ երկրում մարդու իրավունքների վիճակի բարելավման։

Արաբական երկրներին զենքի վաճառքի հաստատման գործընթացում վարչակազմը պետք է նաեւ տեղեկացնի Կոնգրեսին եւ ասի՝ արդյոք գործարքը վնաս է հասցնում Իսրայելի որակական ռազմական առավելությանը տարածաշրջանում։ Իսրայելի աջակցությունը F-15-ի գործարքին կարող է զգալիորեն օգնի համոզել Բայդենի վարչակազմին եւ Կոնգրեսի անդամներին հաստատել այն:

CENTCOM-ի հեռացող հրամանատար, գեներալ Ֆրենկ Մակքենզին անցյալ շաբաթ Սենատի Զինված ծառայությունների հանձնաժողովին ասել էր, որ ԱՄՆ-ն պլանավորում է հաստատել Եգիպտոսին առաջադեմ F-15 ինքնաթիռների վաճառքը:

Իսրայելցի պաշտոնյաներն ասում են, որ F-15-ի գործարքը կնքվել է անցյալ տարի, երբ Եգիպտոսը սկսեց վերանայել 2018 թվականի վերջին Ռուսաստանի հետ ստորագրած «Սու-35» կործանիչների գնման պայմանագիրը: Թրամփի վարչակազմը սպառնացել է պատժամիջոցներ կիրառել Եգիպտոսի դեմ, եթե Ռուսաստանի հետ գործարքը կայանա։ Եգիպտացիներն ընդգծել են, որ պայմանագիրը ստորագրել են Ռուսաստանի հետ, քանի որ ԱՄՆ-ն չի համաձայնել իրենց ժամանակակից ինքնաթիռներ տրամադրել։

Եգիպտոսն արդեն վերանայում էր Ռուսաստանի հետ գործարքը, բայց երբ ԱՄՆ-ն եւ արեւմտյան այլ երկրներ խստացրին պատժամիջոցները Մոսկվայի նկատմամբ ուկրաինական ճգնաժամի պատճառով, Եգիպտոսի պաշտոնյաները սկսեցին էլ ավելի լրջորեն «Սու-35»-ի գործարքին այլընտրանք փնտրել:

Իսրայելի պաշտոնյաները Սպիտակ տան Ազգային անվտանգության խորհրդին, Պետդեպարտամենտին եւ Պենտագոնին հայտնել են, որ աջակցում են F-15-ի գործարքին: Իսրայելցիները հայտարարել են, որ ԱՄՆ-ի եւ Իսրայելի համար ավելի լավ կլիներ, եթե Եգիպտոսն ամերիկյան զենքի համակարգեր ունենար, այլ ոչ թե՝ ռուսական կամ չինական:

Իսրայելցի բարձրաստիճան պաշտոնյան ասել է, որ Իսրայելը վաղուց է մտահոգված Եգիպտոսի եւ ԱՄՆ-ի միջեւ լարված հարաբերություններով եւ կարծում է, որ ամերիկա-եգիպտական ​​կապերի ամրապնդումը եւ բարելավումը բխում է Իսրայելի շահերից: