Ալիևն իր «խաղաղության օրակարգում» ապավինում է ԱՄՆ օգնությանը եւ աննկատ կերպով շանտաժի է ենթարկում

Ադրբեջանի նախագահ Իլհամ Ալիեւը շնորհակալություն է հայտնել ԱՄՆ նախագահ Բայդենին Նովրուզի տոնի առթիվ իրեն շնորհավորելու համար, հայտնում է AzerTAc-ը։

Նամակում Ալիեւը թվարկում է երեք տասնամյակների համագործակցության բոլոր ձեռքբերումները՝ երկկողմ եւ բազմակողմ հիմունքներով։ Ալիեւը հատուկ ուշադրություն է դարձնում էներգետիկ ոլորտին: «Մենք բարձր ենք գնահատում ԱՄՆ-ի հետեւողական աջակցությունը հարուստ էներգետիկ ռեսուրսների զարգացմանը Կասպից ծովի ադրբեջանական հատվածում եւ համաշխարհային շուկա դրանց տեղափոխմանը, լայնածավալ անդրազգային էներգետիկ նախագծերի իրականացմանը, որոնք մեծ նշանակություն ունեն համաշխարհային էներգետիկ անվտանգության ապահովման համար»,- ասված է նամակում։

«Որպես խաղաղության կողմնակիցներ՝ մենք պատրաստ ենք Հայաստանի հետ բանակցություններ սկսել խաղաղության համաձայնագրի շուրջ՝ հիմնվելով միջազգային իրավունքի հիմնարար սկզբունքների վրա, ինչպիսիք են տարածքային ամբողջականությունը, ինքնիշխանությունը եւ մեր երկրի միջազգայնորեն ճանաչված սահմանների անձեռնմխելիությունը։ Մենք հուսով ենք, որ Միացյալ Նահանգները կաջակցի Ադրբեջանի խաղաղության օրակարգին, որը հիմնված է ապագայի տեսլականի վրա։ Ազատագրված հողերում վերականգնողական ու վերակառուցման աշխատանքներ են ընթանում։ Ուրախ կլինենք տեսնել ԱՄՆ-ից ընկերությունների մասնակցությունն այս գործընթացին։ Հավատում եմ, որ, լինելով ընկերներ եւ գործընկերներ, մենք կշարունակենք համատեղ ջանքեր գործադրել բոլոր ոլորտներում մեր համագործակցությունն էլ ավելի զարգացնելու համար»,- նշել է Ալիեւը:

Այդպես, նույնիսկ այս նամակում Ալիեւը չի կարողացել դիմակայել փաստերը խեղաթյուրելու եւ շանտաժի գայթակղությանը։ Նախ՝ Ալիեւը միտումնավոր կերպով սկզբունքների ամբողջ ցանկից առանձնացնում է մեկը: Դիվանագիտականից թարգմանաբար Ադրբեջանի նախագահը հիշեցնում է ԱՄՆ նախագահին իր նավթի եւ գազի պաշարների մասին՝ կապելով դա Բաքվի դիրքորոշմանը Վաշինգտոնի աջակցության հետ։ Հաշվի առնելով, որ հավաքական Արեւմուտքն էներգետիկ անվտանգության խնդիրները շատ ավելի բարձր է դասում, քան իր կողմից հռչակված ժողովրդավարության եւ մարդու իրավունքների արժեքները, հնարավոր է, որ Ալիեւը ճիշտ շեշտադրումներ է ընտրել։ Հակառակ դեպքում նույն Արեւմուտքը ինչ-որ կերպ կարձագանքեր երկշաբաթյա «գազային շրջափակմանը», որին Ադրբեջանը ենթարկեց Արցախի Հանրապետության բնակչությանը։

Հիշեցնենք, որ Արցախի գազամատակարարման հետ կապված խնդիրները սկսվել են մարտի 8-ից։ Հայաստանից Լեռնային Ղարաբաղ ձգվող գազատարի՝ Ադրբեջանի կողմից վերահսկվող հատվածում վթար է տեղի ունեցել: Վթարին ադրբեջանցիների մասնակցության աստիճանը դեռ պարզ չէ։ Ադրբեջանական կողմը տարբեր պատրվակներով հայ մասնագետներին թույլ էր տալիս վերանորոգել գազատարը։ Երկար բանակցություններից հետո Ադրբեջանը համաձայնեց վերանորոգել այն։ Ի վերջո, մարտի 19-ին գազամատակարարումը վերականգնվեց, բայց երկար չտեւեց. մարտի 21-ի երեկոյան գազամատակարարումն Ադրբեջանի անմիջական միջամտությամբ դադարեցվեց։