Թուրքիայի կենտրոնական բանկի որոշումից հետո լիրան շարունակել է անկումը

Թուրքիայի կենտրոնական բանկը երրորդ ամիսն անընդմեջ տոկոսադրույքները թողել է անփոփոխ, նույնիսկ այն բանից հետո, երբ ինֆլյացիան հասել է 54,4 տոկոսի՝ վերջին տասնամյակի ամենաբարձր մակարդակի, գրում է Ahval-ը։

Բազային շաբաթական ռեպո տոկոսադրույքը կմնա 14 տոկոսի մակարդակում։

Կենտրոնական բանկի որոշումից հետո լիրայի փոխարժեքը շարունակել է նվազել 1,2 տոկոսից՝ հասնելով 14,79-ի մեկ դոլարի դիմաց: Ներդրողները մտահոգված են, որ նախագահ Ռեջեփ Էրդողանի կողմից թելադրված Կենտրոնական բանկի քաղաքականությունն անկայուն է՝ հաշվի առնելով ինֆլյացիայի բարձր մակարդակը եւ վճարային հաշվեկշռի կտրուկ վատթարացումը, որը պայմանավորված է ուկրաինական հակամարտության պատճառով էներգակիրների գների աճով:

«Վտանգավոր ժամանակներ են Թուրքիայի եւ լիրայի համար»,- ասել է Լոնդոնում տեղակայված BlueBay Asset Management-ի զարգացող շուկաների ավագ ռազմավար Թիմ Էշը:

Թուրքիայի Կենտրոնական բանկը 2021թ․ վերջին չորս ամիսների ընթացքում 19 տոկոսից 5 տոկոսային կետով նվազեցրել է տոկոսադրույքները, ինչը հանգեցրել է լիրայի անկմանը եւ ինֆլյացիայի աճին։ Էրդողանն ասում է, որ բարձր տոկոսադրույքներն առաջացնում են ինֆլյացիա, ինչը հակասում է ավանդական տնտեսական տեսությանը։

Կենտրոնական բանկի կողմից անցած շաբաթ հրապարակված վճարային հաշվեկշռի տվյալների համաձայն՝ հունվարին Թուրքիայի ընթացիկ գործառնությունների հաշվի դեֆիցիտը հասել է 7,11 միլիարդ դոլարի՝ ամենաբարձր մակարդակը վերջին չորս տարվա ընթացքում եւ 5,34 միլիարդ դոլարով ավելի, քան 12 ամիս առաջ:

Կենտրոնական բանկը հինգշաբթի հայտարարել է, որ ակնկալում է ինֆլյացիոն ճնշման թուլացում, սակայն չի նշել ժամկետները։

Կենտրոնական բանկի հաջորդ քայլը կարող է լինել տոկոսադրույքների նվազեցումը։ Ասյ մասին ասել է Capital Economics-ի զարգացող շուկաների գծով ավագ տնտեսագետ Ջեյսոն Թուվին:

«Մենք ակնկալում ենք, որ առաջիկա ամիսներին քաղաքականության չափանիշները կմնան անփոփոխ: Բացառությամբ լիրայի հերթական փլուզման՝ ինֆլյացիան կտրուկ նվազի այս տարեվերջին, եւ դա կարող է հանգեցնել տոկոսադրույքի հերթական նվազման»,- նշել է Թուվին։