Ընտրությունների արդյունքներից դժգոհ փարաքարցիները բողոքի ցույց են անցկացրել Երևանում

Արմավիրի մարզի Փարաքար համայնքի բնակիչները համաձայն չեն համայնքի ղեկավարի ընտրությունների արդյունքներին, նրանք մարտի 17-ին բողոքի ցույց են անցկացրել կառավարության շենքի առջեւ։

«Ապրելու երկիր» կուսակցությունից այդ պաշտոնի թեկնածու Վոլոդյա Գրիգորյանը լրագրողների հետ զրույցում կառավարությունից պահանջել է չմիջամտել դատարանի վճռին, որն ընդունվելու է վաղը։ Նրա խոսքով՝ կառավարությունը պետք է որոշում ընդունի արտահերթ ընտրությունների անցկացման մասին։ «Դատարանի վրա ճնշում է գործադրվում։ Մենք ցանկանում ենք, որպեսզի կառավարությունը չմիջամտի դատական համակարգի գործերին, որպեսզի դատարանը կարողանա անկախ, ճիշտ որոշում կայացնել։ Դատարանը պետք է պարտավորեցնի կառավարությանը արտահերթ ընտրություններ անցկացնել Փարաքարում, համայնքապետարանը պետք է ցրվի»,- նշել է Գրիգորյանը։

Նա հաստատել է, որ այն օրերին հանդիպել է Սուրեն Պապիկյանի հետ (այն ժամանակ նա զբաղեցնում էր փոխվարչապետի պաշտոնը- խմբ.), բայց գերադասել է չպատասխանել այն հարցին, թե արդյոք Պապիկյանն առաջարկել է միանալ իշխանություններին եւ դառնալ համայնքի ղեկավար։ Ցույցի մասնակիցներից մեկը չի բացառել, որ ապագայում կարող են կազմակերպվել անհնազանդության ակցիաներ՝ արդյունքի հասնելու եւ համայնքի մեկ ղեկավար ընտրելու նպատակով։

Հիշեցնենք, որ Փարաքարում իրենց ընտրված էին համարում միանգամից երկու մարդիկ՝ «Ապրելու երկիր» կուսակցության թեկնածուն եւ «Դավիթ Մինասյան» դաշինքի թեկնածուն։ Տեղական ընտրությունների արդյունքներով՝ սկզբում համայնքի ղեկավարի պաշտոնում առաջադրվել էր «Ապրելու երկիր» կուսակցության թեկնածու Վոլոդյա Գրիգորյանը, որն ընտրվել էր 10 ձայնով։ «Ապրելու երկիր» կուսակցության պարզաբանման համաձայն՝ օրենքը թույլ է տալիս 40 տոկոս ձայներով ընտրել միակ թեկնածուի։ Ավելի ուշ ավագանու անդամները, այդ թվում կառավարող «Քաղաքացիական պայմանագիր» կուսակցությունից, որոնք պաշտպանում էին «Դավիթ Մինասյան» դաշինքի թեկնածուին, Մինասյանին ընտրել են 11 ձայնով, այսինքն՝ ձայների ավելի քան 50 տոկոսով։

Ավելի ուշ «Ապրելու երկիր» կուսակցությունը հայտարարություն է տարածել Փարաքարի համայնքապետարանի լիազորությունների ժամկետից շուտ դադարեցման եւ արտահերթ ընտրությունների անցկացման մասին։