Տոկաևն առաջարկել է հրաժարվել կառավարման «սուպերնախագահական» ձևից

Ղազախստանը պետք է կառավարման սուպերնախագահական ձեւից անցնի ուժեղ խորհրդարանով նախագահական հանրապետության ձեւին, ասել է նախագահ Կասիմ-Ժոմարտ Տոկաեւը երկրի ժողովրդին հղած իր ուղերձում, տեղեկացրել է NUR.KZ-ը։

Պետության ղեկավարը հայտարարել է, որ առաջարկում է Ղազախստանի քաղաքական համակարգի համալիր արդիականացման ծրագիր։ «Խոսքն առաջին հերթին կառավարման սուպերնախագահական ձեւից ուժեղ խորհրդարան ունեցող նախագահական հանրապետության վերջնական անցման մասին է։ Այդ համակարգը կապահովի իշխանական ինստիտուտների օպտիմալ հավասարակշռություն եւ կնպաստի երկրի կայուն զարգացմանը»,- ասել է նա։

Տոկաեւի խոսքով՝ այսօր Ղազախստանում «ամեն բան սկսվում եւ ավարտվում է նախագահով», եւ դրանից պետք է հրաժարվել։

Բացի այդ, պետության ղեկավարն առաջարկել է օրենսդրորեն ձեւակերպել.

նախագահի պարտականությունը՝ դադարեցնելու կուսակցությանն անդամակցությունը լիազորությունների ընթացքում;

պետության ղեկավարի մերձավոր ազգականներին արգելել քաղաքական պետծառայողների պաշտոններ զբաղեցնել եւ ղեկավարել պետական մասնակցությամբ ընկերություններ;

արգելել ակիմներին (շրջանների ղեկավարներին) ու նրանց տեղակալներին՝ զբաղեցնել պաշտոններ կուսակցությունների մասնաճյուղերում;

նախագահական քվոտաների կրճատում սենատում՝ 15-ից հասցնելով 10-ի;

կուսակցության գրանցման համար անհրաժեշտ ստորագրությունների թվի նվազեցում՝ 20 հազարից հասցնելով 5 հազարի;

սոցցանցերում նախընտրական քարոզարշավի անցկացման կանոնները (այժմ այն կանոնակարգված չէ, բայց փաստացի այս կամ այն կերպ անցկացվում է, նշել է Տոկաեւը);

Սահմանադրական դատարանի ստեղծում եւ մահապատժի արգելքի ամրագրում երկրի հիմնական փաստաթղթում։

Նախագահը նշել է, որ քաղաքական փոխակերպումն ուղղված է «խաղի ազնիվ եւ արդարացի կանոնների ձեւավորմանը, ֆավորիտիզմն ու մոնոպոլիաներն արմատախիլ անելուն կյանքի բոլոր ոլորտներում»։