Ավագանին հերթական նիստն է անցկացնելու. Կքննարկվի և կհաստատվի Երևան քաղաքի զարգացման 2021թ. ծրագրի իրականացման հաշվետվությունը. Կհիշեն Հայկ Մարությանին. «Ժողովուրդ»

«Ժողովուրդ» օրաթերթը գրում է.

«Այսօր Երևանի ավագանին հերթական նիստն է անցկացնելու, որի օրակարգում ընդգրկված է 20 հարց: Այդ հարցերի թվում ավագանին պետք է քննարկի և հաստատի Երևան քաղաքի զարգացման 2021 թվականի ծրագրի իրականացման հաշվետվությունն ու Երևան քաղաքի 2021 թվականի բյուջեի կատարման հաշվետվությունը:

Մինչ այն կքննարկվի ավագանու նիստում, «Ժողովուրդ» օրաթերթն արդեն իսկ ուսումնասիրել է թեման: Մենք տեղեկացանք, որ Երևան քաղաքի 2021 թվականի բյուջեի փաստացի եկամուտները ընդհանուր թվով կազմել են 81 մլրդ 729մլն 646 հազար դրամ՝ ծրագրված 85 մլրդ 801 մլն 844 հազար դրամի փոխարեն, կամ կատարողականը կազմել է 95.3%։ Երեւանի վարչական շրջաններից ամենացածր կատարողականը՝ 81 տոկոս, կատարել է Դավիթաշեն վարչական շրջանի աշխատակազմը, իսկ ամենաբարձրը՝ 90,05 տոկոս՝ Արաբկիր վարչական շրջանը։

«Վերելակների հիմնանորոգում» ծրագիրը կատարվել է 84 տոկոսով, «Մայրուղիների և փողոցների վերակառուցում» ծրագրի կատարողականը կազմել է 69,3 տոկոս, «Եզրաքարերի վերանորոգումը»՝ 84 տոկոս, «Վարչական օբյեկտների հիմնանորոգում» ծրագրով էլ կատարողականը կազմել է 63,4 տոկոս։ Հավելենք, որ այս տեսքով բյուջեի կատարողական քաղաքապետարանն ապահովել է նախկին քաղաքապետ Հայկ Մարությանի օրոք՝ նրա ղեկավարությամբ»:

Առավել մանրամասն՝ թերթի այսօրվա համարում: