Այո, պարենի գները թանկանում են. Գեղամ Գևորգյան

Այո, պարենի գները թանկանում են, բուսայուղի գները թանկանում են ամբողջ աշխարհում: Հայաստանի Հանրապետությունում, ի տարբերություն բազմաթիվ երկրների, գները շատ ավելի ցածր են, եւ դա մեր շնորհիվ չէ, այլ ռուս-հայկական երկկողմանի հարաբերությունների շնորհիվ է, որ ապրանքները մատակարարվում են առավել հարմար գներով: Այդ մասին լրագրողների հետ զրույցում հայտարարել է Հայաստանի Մրցակցության պաշտպանության հանձնաժողովի նախագահ Գեղամ Գևորգյանը:

«Այո, պարենի գները թանկանում են, բուսայուղի գները թանկանում են ամբողջ աշխարհում: Հայաստանի Հանրապետությունում, ի տարբերություն բազմաթիվ երկրների, գները շատ ավելի ցածր են, եւ դա մեր շնորհիվ չէ, այլ ռուս-հայկական երկկողմանի հարաբերությունների շնորհիվ է, որ ապրանքները մատակարարվում են առավել հարմար գնով:

Այժմ մենք փորձում ենք գտնել առավել մատչելի եղանակներ տնտեսվարող սուբյեկտների հետ, որպեսզի գնային ցնցումներ տեղի չունենան, եւ դիզելային վառելիքի գները ցնցումներ առաջացնեն: Ներկայում Հայաստանի Հանրապետությունում պահպանվում է այսօրվա գինը, եւ այդ գնով առնվազն երկու ամսվա պաշարը մենք ունենք: Հնարավոր է, որ որոշ տնտեսվարողների շրջանում այդքան չլինի: Իսկ ինչ վերաբերում է շաքարին, եթե մենք ձեռքբերենք նոր խմբաքանակ կամ ճակնդեղ, որն այժմ բավականին թանկ արժե բորսայում, կարող է գրանցվել մի փոքր թանկացում, սակայն ներկայում այդ խնդիրը չկա»,-ասել է Գեւորգյանը:

Նրա խոսքով՝ Հայաստանում չկա որեւէ ապրանքի պակաս, իսկ այժմ տեղի է ունենում նույն գործընթացը, որը դիտարկվում էր կորոնավիրուսի համավարակի ժամանակ, երբ մարդիկ մեկ օրվա ընթացքում մեծ քանակությամբ գնումներ էին կատարում, իսկ մատակարարները չէին հասցնում ապահովել այդ ծավալը խանութներում:

«Ուստի առնվազն ինձ պարզ չէ մեծ քանակությամբ գնումներ կատարելու անհրաժեշտությունը, քանի որ այդ ապրանքները մնում են տանը, այնուհետեւ՝ փչանում:

Քանի որ, եթե մենք մտահոգվեինք, որ ապրանքները բավարար չեն, մենք կսահմանափակեինք առեւտուրն ու կկիրառեինք այլ մեխանիզմներ: Ներկայում այդպիսի խնդիրներ չկան»,-ասել է նա:

Հանձնաժողովի ղեկավարը նաեւ մեկնաբանել է լուրը, որ Ռուսաստանը սահմանափակել է մի շարք ապրանքների, մասնավորապես՝ ցորենի, ալյուրի, բուսայուղի, շաքարի արտահանումը դեպի ԵԱՏՄ երկրներ:

Նրա խոսքով՝ ԵԱՏՄ անդամ յուրաքանչյուր երկիր ներկայացնում է քվոտաների սեփական ցանկը՝ պահանջարկին համապատասխան:

«Մենք մեր քվոտաների ցանկը, սովորական հաշվարկների համաձայն, ամսական կտրվածքով ներկայացրել ենք, եւ խնդիրներ չկան»,-նշել է Գեւորգյանը: