Goldman Sachs-ը կանխատեսել է, թե ինչ տեղի կունենա եվրոպական տնտեսության հետ, եթե Պուտինն անջատի գազը

Բնական գազը հումքային մի քանի ապրանքներից մեկն է, որոնք հայտնվել են խաչաձեւ կրակի տակ Ուկրաինայում հակամարտության պատճառով, եւ եվրոպական տնտեսությունը կարող է տուժել, եթե Ռուսաստանը դադարեցնի դրա արտահանումը, տեղեկացրել է CNBC-ը։

Պատերազմի պատճառով առաջ եկած եւ մատակարարումների հետ կապված վտանգները առաջ են բերել կտրուկ փոփոխականություն ապրանքային շուկաներում, ընդ որում՝ վերջին շաբաթներին բնական գազի գների հետ մեկտեղ էապես բարձրացել են նաեւ նավթի, նիկելի եւ ցորենի գները։

Եվրոգոտին արտադրում է բնական գազով արտադրվող էներգիայի մոտ մեկ քառորդը, այն դեպքում, երբ Ռուսաստանին բաժին է ընկնում գազի ներմուծման մոտ մեկ երրորդը։ Goldman Sachs-ի կարծիքով՝ ներմուծման հետ կապված ցանկացած խափանում կարող է զգալի հետեւանքներ ունենալ եվրոգոտու տնտեսական արտադրության եւ գնաճի վրա։

Goldman-ի եվրոպական գլխավոր տնտեսագետ Սվեն Յարի Սթենը եւ նրա թիմը ներկայացրել են մի քանի սցենարներ եւ գնահատել, թե ինչպես դրանք կարող են ազդել եվրոպական տնտեսության վրա։

Մասնավորապես, ներկայացվել է մի սցենար, ըստ որի՝ մատակարարումների հետագա խափանումներ չեն լինի, հոսքի կրճատումից բացի, որը տեղի է ունենում անցած տարվա սեպտեմբերից, մյուս սցներաի համաձայն՝ Ուկրաինայով գազի ներկրումը կդադարեցվի մինչեւ տարեվերջ, երրորդ սցենարով ռուսական ամբողջ խողովակաշարային արտահանումը կդադարեցվի 2022թ. ընթացքում։

«Համադրելով գազի մատակարարման ֆիզիկական սահմանափակումները եւ բարձր գնային ճնշումը՝ ՀԱԱ-ի (Համախառն ավելացված արժեք) վրա էֆեկտով, մենք հաշվարկել ենք, որ 2022թ. ընդհանուր առմամբ գազի բարձր գները կարող են ազդել եվրոգոտու ՀՆԱ-ի աճի վրա 0,6 տոկոսային կետով եւ Մեծ Բրիտանիայում՝ 0,1 տոկոսային կետով՝ մեր բազային կանխատեսման համեմատ, եթե ենթադրենք, թե գազի մատակարարման հետագա խափանումներ չեն լինի»,- ասել է Սթենը։

Գերմանիայի վրա ազդեցությունը, հավանաբար, էլ ավելի զգալի կլինի (-0,9 տոկոսային կետ) ռուսական գազից մեծ կախվածության պատճառով, ավելացրել է Սթենը։

«Սցենարը, ըստ որի՝ Ռուսաստանը կդադարեցնի ամբողջ խողովակաշարային արտահանումը, 2022թ. կարող է հանգեցնել եվրոգոտու ՀՆԱ-ի աճի նվազման 2,2 տոկոսային կետով՝ մեր բազային կանխատեսման համեմատ, ընդ որում՝ զգալի ազդեցություն կլինի Գերմանիայի (-3,4 տոկոսային կետ) եւ Իտալիայի (-2,6 տոկոսային կետ) վրա»,- նշել է վերլուծաբանը։

Ինչ վերաբերում է գնաճին, ապա այն սցենարը, ըստ որի՝ գազի հոսքն Ուկրաինայով կդադարեցվի, 0,7 տոկոսային կետ կավելացնի Goldman Sachs-ի՝ եվրոգոտում գնաճի վերաբերյալ կանխատեսմանը 2022թ. դեկտեմբերին։

«Եթե գազի գներն ավելանան այսուհետ եւս Ռուսաստանի գազամուղներով գազի մատակարարումների դադարեցման պատճառով, բազային գնաճի վերաբերյալ մեր բազային կանխատեսումը կարող է ավելանալ 1,3 տոկոսային կետով եւ, հավանաբար, դա նույնպես զգալիորեն կանդրադառնա բազային գների վրա»,- ասել է վելուծաբան Շթեյնը։

«Մեծ Բրիտանիայում մենք սպասում ենք 22-90 տոկոսի միջակայք գների հոկտեմբերյան շեմի համար՝ երեք սցենարների համաձայն, ինչը վկայում է երկկողմ վտանգի մասին մեր 55 տոկոս ենթադրվող ընթացիկ կանխատեսման շուրջ»,- ավելացրել է նա։

Էներգակիրների գների հետագա բարձրացման հեռանկարը սաստկացրել է ստագֆլյացիայի շրջանի վերաբերյալ մտահոգությունները, երբ համաշխարհային տնտեսությունը կսկսի տառապել բարձր գնաճից՝ դանդաղ տնտեսական աճի եւ բարձր գործազրկության կողքին։

Հաշվի առնելով դեպի Եվրոպա արտահանումից Ռուսաստանի կախվածությունը եւ եկամուտների մշտապես կրճատվող աղբյուրներն այլ երկրներում՝ միջազգային պատժամիջոցների փաթեթի համատեքստում, BCA Research-ի փորձագետները ենթադրել են, որ լիակատար դադարեցումն այնքան էլ հավանական չէ։

«Չնայած անցած ամիս Մոսկվան նոր համաձայնագիր է կնքել Պեկինի հետ CNPC չինական ընկերությանը տարեկան լրացուցիչ 10 մլրդ խորանարդ մետր գազ մատակարարելու մասին, նոր խողովակաշարի կառուցումը այդ մատակարարումների համար երկուսից երեք տարի կտեւի»,- ասել է BCA Research-ի գլխավոր եվրոպական ստրատեգ Մաթիե Սավարին։

«Ռուսաստանն ստիպված կլինի այդ ընթացքում հենվել Եվրոպայում սեփական վաճառքների վրա՝ Ուկրաինա իր ռազմական ներխուժումը ֆինանսավորելու եւ ներքին կայունությունն ապահովելու համար»,- ավելացրել է նա։