ԱՄՆ-ն 45 մլն դոլարի աջակցություն կհատկացնի Հայաստանին, եւս 2 մլն դոլար՝ Արցախին

ԱՄՆ Ներկայացուցիչների պալատը եւ Սենատը 2022 ֆինանսական տարվա շրջանակում համաձայնել են 45 միլիոն դոլար օգնություն հատկացնել Հայաստանին եւ 2 միլիոն դոլար՝ Արցախին։ Այս մասին ասվում է հայտարարության մեջ, որը հրապարակվել է Ամերիկայի հայկական համագումարի կայքում։ Հատկացված միջոցները կուղղվեն, ի թիվս այլնի, տարածքների ականզերծմանը։

Օրինագծով նաեւ պահանջվում է, որ «Հայաստանին եւ Ադրբեջանին օգնություն ցուցաբերելու մասին օրենքի IV կետով նախատեսված միջոցների տրամադրման ցանկացած պարտավորությունից առաջ պետքարտուղարը խորհրդակցի այդ միջոցների հատկացման հանձնաժողովների հետ՝ կապված միջոցների առաջարկվող կիրառման հետ»։

Կոնգրեսում Հայաստանի հարցերով հանձնաժողովի փոխնախագահ Ադամ Շիֆը եւ այլ կոնգրեսականներ ավելի վաղ նամակ էին հղել՝ կոչ անելով ԱՄՆ Կոնգրեսի Ներկայացուցիչների պալատի եւ Սենատի պետական ​​եւ արտասահմանյան գործառնությունների հատկացումների եւ հարակից ծրագրերի ենթահանձնաժողովների ղեկավարությանը հավելյալ 50 միլիոն դոլարի մարդասիրական օգնություն հատկացնել Արցախին։

Օրենքի նախագիծը ներառում է «Ազատության աջակցության մասին» օրենքի 907-րդ հոդվածի ձեւակերպումը, ինչպես նաեւ պահանջում է զեկույց Արցախի դեմ ռազմական գործողությունների հավանականության մասին՝ «սույն օրենքն ուժի մեջ մտնելու օրվանից ոչ ուշ, քան 90 օր հետո»։

Նշենք, որ անցյալ շաբաթ ԱՄՆ Սենատի միջազգային հարաբերությունների հանձնաժողովի նախագահ Ռոբերտ Մենենդեսը հրապարակել էր կառավարության հաշվեքննիչ պալատի զեկույցը, որում նշվում էր, որ «Պետդեպարտամենտը չի կատարել Ադրբեջանին ԱՄՆ կառավարության օգնության վերանայման հարցով հաշվետվության պահանջները»։

Բացի այդ, ըստ Մենենդեսի, զեկույցը «պարզել է, որ մի քանի տարվա ընթացքում ԱՄՆ Պետդեպարտամենտը եւ պաշտպանության նախարարությունը չեն կատարել Կոնգրեսին ներկայացվող հաշվետվությունների պահանջները՝ Հայաստանի եւ Ադրբեջանի միջեւ ռազմական հավասարակշռության վրա ԱՄՆ-ի օգնության ազդեցության վերաբերյալ»։