ԱԷՄԳ-ին հաջողվել է ուկրաինական ատոմակայանների անվտանգության շուրջ երկխոսություն սկսել ՌԴ-ի և Ուկրաինայի միջև

Ռուսաստանի եւ Ուկրաինայի միջեւ ուկրաինական ատոմակայանների անվտանգության ապահովման հարցով երկխոսություն սկսելու առաջին փորձն իրականացրել է Ատոմային էներգիայի միջազգային գործակալությունը (ԱԷՄԳ), սակայն դեռ շատ աշխատանք կա անելու։ Այս մասին հինգշաբթի օրը հայտարարել է ԱԷՄԳ-ի գլխավոր տնօրեն Ռաֆայել Գրոսսին։ Ավելի վաղ նա Թուրքիայում բանակցություններ է վարել Ուկրաինայի եւ Ռուսաստանի արտգործնախարարներ Դմիտրի Կուլեբայի եւ Սերգեյ Լավրովի հետ՝ ռուսական ռազմական գործողության պատճառով ուկրաինական ատոմակայանների շահագործման անվտանգության ապահովման հարցի շուրջ։

Նրա խոսքով, ինքը Թուրքիայում կառուցողական բանակցություններ է ունեցել։ «Իմ առաջին նպատակը ամենաբարձր մակարդակով ուղիղ երկխոսություն հաստատելն էր։ Սրան հաջողվեց հասնել։ Մենք կարեւոր հանդիպումներ ունեցանք»,- ասել է Գրոսսին։

ԱԷՄԳ-ը չի կարող հաստատել, որ Չեռնոբիլի ատոմակայանը, որը հոսանքազրկված է, միացված է Բելառուսի էլեկտրաէներգիային։

«Մենք դրա հաստատումը չունենք»,- ասել է Գրոսսին՝ պատասխանելով այն հարցին, թե կարող է արդյոք ինքը հաստատել, որ Չեռնոբիլի ատոմակայանը միացված է Բելառուսի էլեկտրաէներգիային: «Ես չեմ կարող դա հաստատել»,- հավելել է նա։

Ռուսաստանի Դաշնության ռազմական գործողության սկսվելուց հետո ԱԷՄԳ-ը հայտնել է, որ Ուկրաինան գործակալությանը ծանուցել է Չեռնոբիլի ատոմակայանի նկատմամբ վերահսկողությունը կորցնելու մասին, որը գրավվել է ռուսական զորքերի կողմից, Զապորոժիեի ատոմակայանի անցման մասին, ինչպես նաեւ Կիեւում եւ Խարկովի մերձակայքում միջուկային թափոնների պահեստավորման օբյեկտների գնդակոծության մասին։ Ներկայումս ռադիացիայի տարածման վտանգ չկա։ Գրոսսին այս կապակցությամբ կոչ է արել ապահովել Ուկրաինայի միջուկային օբյեկտների անվտանգությունը ռազմական գործողություններից՝ տարածքի միջուկային աղտոտումը կանխելու համար: