Մակրոնն ուզում է վերջ դնել Ուկրաինայում հակամարտությանը՝ չդառնալով դրա մասնակից

Ֆրանսիան դիվանագիտական և տնտեսական միջոցներ է ձեռնարկում Ուկրաինայում հակամարտությունը դադարեցնելու համար, սակայն չի ցանկանում դառնալ դրա մասնակիցը և պատերազմել Ռուսաստանի դեմ։ ТАСС գործակալության փոխանցմամբ՝ այս մասին LCI հեռուստաալիքի եթերում հայտարարել է Ֆրանսիայի նախագահ Էմանուել Մակրոնը։

«Մենք անում ենք ամեն ինչ, որպեսզի միջնորդական աջակցություն ցուցաբերենք Ուկրաինայի և Ռուսաստանի միջև բանակցություններում։ Ֆրանսիան կշարունակի պատժամիջոցներով ճնշում գործադրել Ռուսաստանի ղեկավարների և Ռուսաստանի տնտեսության վրա, աջակցել Ուկրաինային: Մենք ցանկանում ենք վերջ դնել այս պատերազմին՝ առանց պատերազմող կողմ դառնալու», – ասել է Մակրոնը:

Մակրոնն ընդգծել է, որ Ռուսաստանի դեմ սահմանված պատժամիջոցներն արձագանք են ուկրաինական իրադարձություններին, ինչը, սակայն, ամենևին չի նշանակում, որ Փարիզը պատերազմ է ցանկանում Մոսկվայի հետ։ Ի դեպ, մարտի 5-ին ՌԴ նախագահ Վլադիմիր Պուտինը հայտարարել էր, որ ԱՄՆ-ի և արևմտյան այլ երկրների կողմից Ռուսաստանի դեմ պատժամիջոցների կիրառումը նման է պատերազմի հայտարարման։ Միաժամանակ նա նշել էր, որ գործը դրան դեռ չի հասել։

Ֆրանսիայի ղեկավարը մտահոգություն է հայտնել Ուկրաինայում տիրող ընդհանուր իրավիճակի կապակցությամբ, որը, նրա խոսքով, «շարունակում է ամեն օր վատթարանալ»։ Նա առանձին անդրադարձել է Ուկրաինայի ատոմակայանների անվտանգությանը՝ նշելով, որ իրենք առաջին հերթին կենտրոնացած են ատոմային էներգետիկայի ոլորտում աղետից խուսափելու վրա։

Մակրոնը նաև անդրադարձել է հումանիտար ջանքերին՝ իր հայրենակիցներին կոչ անելով աջակցել բարեգործական ընկերություններին, որոնք մարդասիրական օգնություն են ուղարկում հակամարտությունից տուժածներին։

Ֆրանսիայի նախագահը նաև վստահեցրել է, որ իրենք պատրաստ են կենտրոնացնել ջանքերը ռազմական գործողություններից փախչող ուկրաինացիներին ընդունելու համար։ Նա նաև կասկածանքով է արձագանքել Ուկրաինայի քաղաքացիներին Ռուսաստանի տարածք տարհանելու հնարավորությանը՝ դա անվանելով ցինիզմ բարոյական և քաղաքական տեսանկյունից։