Sony-ն ու Honda-ն կզբաղվեն էլեկտրամոբիլների համատեղ արտադրությամբ

Sony եւ Honda ճապոնական երկու խոշորագույն ապրանքանիշերը հայտարարել են էլեկտրամոբիլների արտադրությամբ եւ վաճառքով զբաղվող համատեղ ձեռնարկություն ստեղծելու ծրագրերի մասին, հաղորդում է CNN-ը:

Ընկերությունը կստեղծվի այս տարվա վերջում, իսկ մատակարարումները կմեկնարկեն 2025 թվականին:

Համաձայնագրի մանրամասները դեռեւս քննարկվում են եւ ենթակա են հաստատման կարգավորիչ մարմինների կողմից, ասվում է երկու ընկերությունների համատեղ հայտարարության մեջ:

«Ակնկալվում է, որ նոր ընկերությունը կպլանավորի, կնախագծի, կծրագրավորի ու կվաճառի էլեկտրամոբիլները, սակայն չի տնօրինի եւ չի կառավարի արտադրական հզորությունները»,-հավելել են նրանք: Honda-ն կզբաղվի իր գործարաններից մեկում արտադրությամբ:

Իր հերթին Sony-ին պետք է ստեղծի հարթակ, որը կտրամադրի շարժունության ծառայություններ, ասվում է հաղորդագրության մեջ:

Այդ ճապոնական ապրանքանիշն առավել հայտնի է իր էլեկտրոնային գաջեթներով եւ ժամանցային պրոդուկտներով:

Սակայն վերջերս նա հայտարարել է ավտոմոբիլային արդյունաբերության ոլորտ մուտք գործելու մասին՝ ներկայացնելով ավտոմեքենայի իր առաջին նախատիպը երկու տարի առաջ CES տեխնոլոգիաների ցուցահանդեսի ժամանակ: 2020 թվականի դեկտեմբերին Sony-ն սկսել է թեստավորել Vision-S 01 ավտոմեքենան Եվրոպայում ընդհանուր նշանակության ճանապարհներին: