Սինգապուրը պատժամիջոցներ է սահմանել «ՎՏԲ», «Ռոսիա», «Պրոմսվյազնանկ» եւ «ՎԵԲ.ՌՖ» բանկերի նկատմամբ

Սինգապուրի իշխանությունները պատժամիջոցներ են կիրառում «ՎՏԲ», «Ռոսիա», «Պրոմսվյազնանկ» եւ «ՎԵԲ.ՌՖ» բանկերի նկատմամբ, արգելում են կրիպտոարժույթով գործարքները, ինչպես նաեւ սահմանափակում են երկակի նշանակության ապրանքների մատակարարումը։ Այս մասին ասված է հանրապետության ԱԳՆ-ի՝ շաբաթ օրը հրապարակված հայտարարության մեջ, փոխանցում է ՏԱՍՍ-ը։

«Սինգապուրի բոլոր ֆինանսական ինստիտուտներին, այդ թվում՝ բանկերին, ֆինանսական ընկերություններին, ապահովագրական ընկերություններին, միջնորդներին, ֆոնդային բորսաներին, վճարային ծառայություններ մատուցողներին արգելվում է աշխատել «ՎՏԲ», «Ռոսիա», «Պրոմսվյազնանկ» եւ «ՎԵԲ.ՌՖ» բանկերի հետ»,- ասվում է հաղորդագրության մեջ։

Բացի այդ, «արգելվում է կապիտալի ներգրավման նպատակով գործարքներ կնքել, ֆինանսական ծառայություններ տրամադրել Ռուսաստանի Դաշնության կառավարությանը, Ռուսաստանի Դաշնության Կենտրոնական բանկին, ինչպես նաեւ ցանկացած իրավաբանական անձի, որին նրանք վերահսկում են կամ որը գործում է նրանց անունից», նշել են գերատեսչությունում: Սահմանափակումները գործում են «նոր արժեթղթերի առքուվաճառքի, կապիտալի ներգրավմանն ուղղված ֆինանսական ծառայությունների մատուցման, նոր վարկերի տրամադրման կամ դրանց մասնակցության մասով», մանրամասնել են ԱԳՆ-ում։ Իշխանությունները նաեւ արգելք են սահմանում սահմանափակումները շրջանցելու նպատակով «կրիպտոարժույթի հետ կապված ցանկացած գործարքին աջակցության համար», ասվում է հայտարարության մեջ։

«Սինգապուրն արտահանման հսկողություն է սահմանում այն առարկաների նկատմամբ, որոնք կարող են որպես զենք օգտագործվել՝ Ուկրաինային վնաս հասցնելու համար, ինչպես նաեւ՝ այն առարկաների, որոնք օգտագործվում են հարձակողական կիբեր օպերացիաների համար»,- ասվում է զեկույցում։ «Այդ կապակցությամբ արգելք է մտցվում Ռուսաստան ռազմական նշանակության ապրանքների, «էլեկտրոնիկա», «համակարգիչներ», «հեռահաղորդակցություն եւ տեղեկատվական անվտանգություն» կատեգորիաներին պատկանող բոլոր ապրանքների մատակարարման վրա»,- մանրամասնել են գերատեսչությունում: