Թումանյանի անձնական գրադարանը կթվայնացվի

Հովհաննես Թումանյանի թանգարանում է պահվում բանաստեղծի անձնական գրադարանը՝ 8000 կտորից ավելի գիրք: Հեքիաթներից մինչև դասական գործեր, բացառիկ հրատարակությունները պահվում են հատուկ պայմաններում՝ շատերին անհասանելի։ Այս գանձարանը շուտով կկարողանան ուսումնասիրել բոլորը՝ առցանց։ Կստեղծվի Թումանյանի էլեկտրոնային գրադարանը։

Անի Եղիազարյան (Հովհաննես Թումանյանի թանգարանի տնօրեն) - Դեռևս 1660-ականների հրատարակություններ կան։ Շուրջ 200 գրքեր համարվում են հնատիպ գրքեր, որոնք 1800-ականների սկիզբ են գնահատվում։ Այսօր Հայաստանի գրադարանի ցանցային համակարգում Թումանյանի գրադարանը այն եզակի տեղն է, որտեղ դրանք պահպանվել են։

Սա թանգարանի վաղեմի ծրագրերից է։

Թամարա Արամյան (Թումանյանի անձնական գրադարանի ֆոնդապահ) - Աշխարհի բոլոր հեքիաթներից, լեգենդներից այստեղ կան նմուշներ, գրքեր։ Այդ թեման Թումանյանին շատ է հետաքրքրել։ Նա էլ հայտնի հեքիաթագիր էր։ Գրքերի վրա կան նշումներ։ Դրանցով մենք կարող ենք իմանալ, թե հատկապես որ թեմաներն են իրեն շատ հետաքրքրել։

Արդեն մի քանի տարի է՝ ինչ նմուշները թվայնացվում են թանգարանի միջոցներով: Հիմա ծրագիրը կիրականացվի խնայողությունների հաշվին՝ թանգարանում արևային ֆոտովոլտային կայանի գործարկմամբ։ Նախաձեռնությունը «Էներգետիկայի հայկական գործակալություն» հիմնադրամինն է:

Ըստ նախնական ծրագրի՝ նախատեսված է 6 տարի ժամկետ։ Մենք պիտի հասցնենք 8150 կտոր գիրքը ունենալ առցանց հարթակում՝ հասանելիության տարբեր մակարդակներում։ Այնտեղ կան եզակի գրքեր, գրքեր՝ Թումանյանի ձեռագրով նմուշներով:

Անի Եղիազարյան - Արդեն ունեն շատ թվային գրքեր։ Դրանք պետք է բերեն պատշաճ վիճակի։ Թանգարանից նշում են՝ մինչ էլեկտրոնային գրադարանի ամբողջական գործարկումը, հարթակում մարդիկ կկարողանան ուսումնասիրել շատ գրքեր։