Ուկրաինայի հայերի մի մասը ևս հեռանում է ռազմական գործողությունների թեժ գոտիներից

Ուկրաինայում ռազմական գործողությունների մեկնարկից մեկ շաբաթ անց էլ մարդիկ շարունակում են զանգվածաբար հեռանալ իրենց բնակավայրերից: Նրանք հիմնականում տեղափոխվում են Ուկրաինայի արևմտյան շրջաններ, որտեղից փորձում են անցնել կա՛մ Եվրամության երկրներ, կա՛մ գոնե Մոլդովա:

Ըստ ՄԱԿ-ի գերագույն հանձնակատարի տվյալների՝ այս ժամանակահատվածում Ուկրաինան լքել է շուրջ 1 միլիոն մարդ: Մոտ կեսին ընդունել է Լեհաստանը: Սլովակիայում և Հունգարիայում փախստականների թիվը հասնում է 120 հազարի: Մեծ հոսք կա նաև դեպի Գերմանիա:

Եվրահանձնաժողովի նախագահ Ուրսուլա ֆոն դեր Լայենն ավելի վաղ հայտարարել էր, որ Միությունն ի վիճակի է ընդունել ուկրաինացի փախստականներին, քանի որ իրադարձությունների զարգացման հնարավոր տարբերակների վաղուց էր պատրաստվում:

ՈՒԿՐԱԻՆԱՅԻ ՀԱՅԵՐԻ ՄԻ ՄԱՍԸ ԼՔՈՒՄ Է ՊԱՏԵՐԱԶՄԱԿԱՆ ԳՈՏԻՆ

Պաշտոնական տվյալներ չկան, սակայն ակնհայտ է, որ նրանց շարքերում կլինեն նաև Հայաստանի քաղաքացիներ կամ հայեր: Երկրում Հայաստանի դեսպանատունը և տարբեր քաղաքներում մեր հյուպատոսությունները շարունակում են աշխատել: Ավելի վաղ մեր արտաքին գործերի նախարարությունը նշել էր, որ Հայաստանի այն քաղաքացիներից, որոնք մտադիր են հայրենիք վերադառնալ՝ հատելով Լեհաստանի, Սլովակիայի, Հունգարիայի, Ռումինիայի և Մոլդովայի սահմանները, այդ երկրների վիզա չի պահանջվի: Կիևում բնակվող Դավիթ Մկրտչյանը նույնպես ընտանիքի հետ պատրաստվում է հեռանալ:

Դավիթ Մկրտչյան (Կիևի բնակիչ) - Դեռ Կիևում ենք: Բայց էսօր կշարժվեմ դեպի արևմտյան Ուկրաինա, քանի որ ընտանիքիս համար այստեղ անվտանգ չէ: Գիշերը բախումներ էին: Ես մտածում եմ՝ դեպի Լվով կամ Զակարպատյե:

Կիևում այս գիշեր համեմատաբար հանգիստ է եղել, սակայն քաղաքի շուրջ ընդհանուր լարվածությունը չի նվազում: Մայրաքաղաքի կենտրոնական կայարանից գնացքները շարունակում են մարդկանց տեղափոխել դեպի արևմուտք: Թեժ գործողությունների կիզակետում հայտնված Կիևի արվարձաններում մասամբ փակվել են խանութները, չի գործում հանրային տրանսպորտը: Չնայած վտանգին՝ շատերը շարունակում են մնալ մայրաքաղաքում. նրանց թվում է մեր հայրենակից Մարատ Հակոբյանը:

Մարատ Հակոբյան (Կիևի բնակիչ) - Հայ համայնքը, ինչպեսև Ուկրաինայի այլ քաղաքացիները, տագնապի ժամանակ փորձում է ապաստարաններում մնալ, ամենահամառները տանն են անցկացնում դա:

Մարատ Հակոբյանի խոսքով՝ առավել բարդ է արևելյան շրջաններից հայերի տարհանումը: Խոսքն առաջին հերթին Խարկով և Մարիուպոլ քաղաքների մասին է:

Մարատ Հակոբյան - Հիմա քանի որ կա մեծ լոգիստիկ խնդիր, հիմնականում ամեն ինչ արվում է ճակատի համար: Ճանապարհները ապահով չեն սահմանին հասնելու համար, եթե առաջին օրերին ապահով էր, հիմա դա արկածախնդրության հետ կարելի ա համեմատել քանի որ խփում են հեռահար հրթիռներից:

Իրենց բնակավայրերում մնացած հայերը փորձում են օգնություն ցուցաբերել ոչ միայն համայնքի ներկայացուցիչներին: Լվովի, ինչպես նաև մի շարք այլ քաղաքների հայկական ռեստորանները սկսել են ուտելիք պատրաստել և անվճար բաժանել բոլորին: