Սպիտակ տունը Պեսկովի եւ Ռուսաստանից 19 գործարարների նկատմամբ պատժամիջոցներ սահմանելու մասին է հայտարարել

ԱՄՆ-ը ակտիվների արգելափակման պատժամիջոցներ է սահմանել ՌԴ նախագահի մամուլի քարտուղար Դմիտրի Պեսկովի, ինչպես նաեւ մի շարք ռուս գործարարների եւ նրանց ընտանիքների անդամների նկատմամբ։ Այս մասին ասվում է հինգշաբթի օրը Սպիտակ տան մամուլի ծառայության տարածած հաղորդագրության մեջ։

«Այսօր ԱՄՆ-ը պատժամիջոցներ է սահմանում (Ռուսաստանի նախագահ Վլադիմիր) Պուտինի մերձավորների լայն շրջանակի եւ նրանց ընտանիքների նկատմամբ»,- ասվում է փաստաթղթում։ Ինչպես վկայում է դրա տեքստը, բացի Պեսկովից, ցուցակում ընդգրկված են Նիկոլայ Տոկարեւը, Բորիս եւ Արկադի Ռոտենբերգները, Սերգեյ Չեմեզովը, Իգոր Շուվալովը, Եվգենի Պրիգոժինը եւ Ալիշեր Ուսմանովը։ Որոշ դեպքերում սահմանափակումները վերաբերում են ցուցակում ընդգրկված անձանց ամուսիններին եւ երեխաներին, ինչպես նաեւ նրանց ընկերություններին կամ այլ ունեցվածքին:

Միացյալ Նահանգները վիզային սահմանափակումներ է սահամանում 19 ռուսաստանցի գործարարների, ինչպես նաեւ նրանց ընտանիքների 47 անդամների ու նրանց հետ կապված անձանց նկատմամբ։

«Այսօր Պետդեպարտամենտը հայտարարում է վիզային սահմանափակումների նոր քաղաքականության մասին որոշ ռուսաստանցի օլիգարխների, նրանց ընտանիքների եւ նրանց հետ սերտ կապ ունեցող անձանց նկատմամբ»,- ասվում է փաստաթղթում։ «Նախնական քայլի շրջանակներում մենք վիզային սահմանափակումներ են ձեռնարկել 19 օլիգարխների ու նրանց ընտանիքների 47 անդամների եւ նրանց հետ սերտ կապ ունեցող անձանց նկատմամբ»,- ասվում է տեքստում։

ԱՄՆ-ը ապատեղեկատվություն տարածելու համար պատժամիջոցներ է սահմանում ռուսական յոթ կազմակերպությունների եւ նրանց հետ կապված 26 անձանց նկատմամբ՝ Ռուսաստանի Դաշնությունից եւ Ուկրաինայից։ ԱՄՆ ֆինանսների նախարարությունը հինգշաբթի պատժամիջոցների ցուցակում ավելացրել է ռուս գործարար Ալիշեր Ուսմանովին, ինչպես նաեւ նրան պատկանող զբոսանավն ու ինքնաթիռը։

«Ուսմանովը ցուցակում ներառվել է՝ կապված Ռուսաստանի տնտեսության տեխնոլոգիական ոլորտում իր գործունեության հետ։ Բացի այդ, ԱՄՆ ֆինանսների նախարարության օտարերկրյա ակտիվների վերահսկողության գրասենյակը Ուսմանովի սուպերզբոսանավը եւ ինքնաթիռը ճանաչում է որպես արգելափակված սեփականություն, որում Ուսմանովը բաժնեմաս ունի: Սա նշանակում է, որ զբոսանավի կամ օդանավի հետ կապված ցանկացած գործողություն, ներառյալ տեխնիկական սպասարկումը, անձնակազմ վարձելը կամ նավահանգիստների մուտքի համար վճարումը, որոնք իրականացվում են ամերիկացիների հետ կամ ԱՄՆ դոլարով, արգելված են»,- ասվում է ԱՄՆ ֆինանսների նախարարության հայտարարության մեջ։