Հունգարիայում Վոլուզիան կայսեր ժամանակաշրջանի հազվագյուտ հռոմեական մետաղադրամ է հայտնաբերվել

Հունգարիայում պեղումների ժամանակ Վոլուզիան կայսեր ժամանակաշրջանի չափազանց հազվագյուտ հնագույն հռոմեական ոսկյա մետաղադրամ են հայտնաբերել: Այդպիսի մետաղադրամները նաեւ որպես աուրեուսներ են հայտնի: Գտածոն եզակի է նաեւ նրանով, որ հազվագյուտ երկկողմանի մետաղադրամ է, որը հաճախ որպես մեդալիոն է դասակարգվում: Դրա արժեքը սովորաբար երկու անգամ ավելի բարձր է, քան սովորական աուրեուսներինը, հայտնում է The History Blog պորտալը:

Վոլուզիան կայսրը երկու տարի՝ 251թ. նոյեմբերից մինչեւ 253թ. օգոստոս, Տրեբոնիան Գալի հոր կառավարակիցն էր: Այնուհետեւ տիրակալները սպանվեցին իրենց իսկ զինվորների կողմից։ Հենց այդքան կարճ կառավարման պատճառով էլ այդ կառավարչի օրոք պատրաստված մետաղադրամները շատ հազվագյուտ են համարվում:

Հայտնաբերված մետաղադրամը 5.62 գրամ է կշռում, տրամագիծը՝ 23 մմ։ Այն պատկերում է կայսեր կիսանդրին՝ լատիներեն մակագրությամբ. «Կայսր Կայուս Վիբիուս Վոլուզիան Օգոստոս»։ Դարձերեսին պատկերված է Լիբերտաս աստվածը։ Դարձերեսի մակագրությունը «Երկու կայսրերի ազատություն» է նշանակում։

Մետաղադրամը հայտնաբերել է մի կամավոր, ով համագործակցում էր Ռիփլ-Ռոնայի թանգարանի հետ Հունգարիայի հարավարեւմտյան Շոմոդ կոմսության մայրուղու լայնացման վայրում հնագիտական ​​պեղումների ժամանակ: Պեղումների ընթացքում նաեւ բրոնզե եւ արծաթե հին հռոմեական մետաղադրամներ, կլոր ապակյա ֆիբուլա, մակագրությամբ արծաթե մատանի եւ բրոնզե բանալի է հայտնաբերվել:

Գիտնականները կարծում են, որ հայտնաբերված չափազանց արժեքավոր եւ հազվագյուտ մետաղադրամը հազիվ թե պատկաներ այն ժամանակվա տեղի բնակիչներից որեւէ մեկին։ Այն հավանաբար կորցրել է այս տեղանքով անցնող ճանապարհորդը։

Մետաղադրամն այժմ գտնվում է Ռիփլ-Ռոնաjի թանգարանում, որտեղ ուսումնասիրվում է՝ ոսկու պարունակությունը պարզելու համար: Այնուհետեւ այն կցուցադրվի թանգարանի մշտական ​​հավաքածուում, որում շուրջ 50 հռոմեական մետաղադրամ է ներկայացված: