Բայդենը հանձնարարել է 600 միլիոն դոլարի «անհապաղ օգնություն» հատկացնել Ուկրաինային

ԱՄՆ նախագահ Ջո Բայդենը հանձնարարել է 600 միլիոն դոլարի օգնություն հատկացնել Ուկրաինային, ներառյալ 350 միլիոն դոլար՝ պաշտպանական ծախսերի համար։ Որոշումը Բայդենն ընդունել է Ուկրաինայում Ռուսաստանի ռազմական գործողությունների ֆոնին, հաղորդում է РБК-ը։

Հուշագիրը հրապարակվել է Սպիտակ տան կայքում։

«Պետքարտուղարին տրամադրել հետեւյալ լիազորությունները <...> անհապաղ ռազմական օգնություն ցուցաբերել Ուկրաինային»,- ասվում է փաստաթղթում։

ԱՄՆ-ի պետքարտուղար Էնթոնի Բլինքենը պետք է որոշի, թե արդյոք ԱՄՆ-ի շահերից է բխում Ուկրաինային 250 միլիոն դոլարի չափով անհատույց օգնություն տրամադրելը։ Եվս 350 միլիոն դոլար են գնահատվել պաշտպանական ծախսերը եւ ՊՆ-ի ծառայությունները։

Կիեւին վարկ տրամադրելու պատրաստակամության մասին հայտնել է նաեւ Մեծ Բրիտանիան։ Խոսքը շուրջ 500 միլիոն դոլարի մասին է։ Նպատակը «ռուսական ագրեսիայի տնտեսական հետեւանքները մեղմելն է»։

Ավելի վաղ ԱՄՆ-ի վարչակազմը Կոնգրեսից խնդրել է հավելյալ 6,4 միլիարդ դոլար՝ Ուկրաինային եւ մի շարք այլ երկրների օգնություն ցուցաբերելու, ինչպես նաեւ Պենտագոնի կարիքների համար, հաղորդում է Bloomberg-ը՝ վկայակոչելով աղբյուրը։ Ենթադրվում է, որ այդ գումարից 2,9 միլիարդ դոլար կհատկացվի Ուկրաինային մարդասիրական աջակցություն ցուցաբերելու համար, ինչպես նաեւ անվտանգության ոլորտում Կիեւին աջակցություն ցուցաբերելու համար։ Բացի այդ, օգնություն կհատկացվի Բալթյան երկրներին, Լեհաստանին, մի շարք այլ պետությունների։ Միջոցները նախատեսված են տնտեսական վիճակի կայունացման, պարենային ապրանքների գնման համար։ Ըստ ծրագրի՝ 3,5 միլիարդ դոլար կհատկացվի Պենտագոնի կարիքների համար՝ կապված Ուկրաինայի իրադարձությունների հետ։